Најмалку шест цивили беа убиени, а 35 други повредени во руски напади низ Украина во текот на изминатите 24 часа, објавија регионалните власти на 7 август, пренесува Кијив Индипендент.
Воздухопловните сили на Украина соопштија дека руските сили лансирале 112 дронови за напад од типот Шахед и дронови-мамки во текот на ноќта. Воздушната одбрана соборила 89 од нив, додека 23 дронови нападнале 11 локации. Остатоци од соборените дронови паднале во уште три области.
Војската соопшти дека нападот бил одбиен со употреба на авиони, мобилни противпожарни екипи, единици за електронско војување и системи за воздушна одбрана.
Во Запаришката област, руските сили убиле четири цивили, а повредиле 13, изјави гувернерот Иван Федоров. Вкупно 723 напади погодиле 12 локалитети низ регионот.
Во Донецката област, руските напади убиле двајца цивили во Костјантинивка и Билокузминивка, изјави гувернерот Вадим Филашкин. Уште шест лица биле повредени во текот на денот.
Осум цивили се повредени во Херсонската област како резултат на руските напади насочени кон станбени населби, критична инфраструктура и социјални објекти, изјави гувернерот Олександр Прокудин.
Во Днипропетровската област се повредени четири лица. Меѓу нив се 43-годишен маж и 69-годишна жена, кои се хоспитализирани во умерена состојба, според гувернерот Серхиј Лисак.
Во Харкивската област се повредени три лица. Гувернерот Олех Синиехубов извести дека 45-годишен и 55-годишен маж се повредени во Купјанск, а 86-годишна жена е ранета во селото Борова.
Во Сумската област, 71-годишен маж е повреден за време на еден од 80-те одделни напади што погодија 40 населени места во регионот, објавија локалните власти.
Нападите доаѓаат во време на континуирано одбивање на Русија да разгледа безусловно примирје, додека Москва ја зголемува употребата на беспилотни летала против украинската цивилна инфраструктура.
Д. Мишев / Цивил Медиа
