Независниот европски медиум Voxeurop на 14 август ја објави анализата „The cost of a captured judiciary in North Macedonia“ на Џабир Дерала, во која се анализира како политичкото влијание врз правосудството, селективната правда и притисоците врз независните гласови со карактеристики на SLAPP-постапки им нанесуваат штета на демократијата, економијата и европската перспектива на земјата.
Во анализата се посочува дека последиците од заробеното правосудство се протегаат далеку подалеку од поединечните судски предмети. Кога судовите и обвинителствата стануваат подложни на политички команди, пишува Дерала, владеењето на правото од демократска гаранција се претвора во инструмент за политичко дисциплинирање.
Посебно внимание е посветено на судските постапки против независни медиуми, граѓански организации и критички настроени интелектуалци, вклучително и случаи со карактеристики на SLAPP – стратешки тужби против јавното учество. Таквиот притисок, се предупредува во текстот, создава ефект на заплашување и поттикнува самоцензура кај оние чија улога е да ја контролираат и преиспитуваат моќта.
Анализата ги разгледува и економските последици од политизираното правосудство. Правната непредвидливост, селективната примена на законите и политички влијаните корпоративни случаи ја поткопуваат довербата на сериозните странски инвеститори, на кои им се неопходни правна сигурност, почитување на договорите и непристрасно решавање на споровите.
Централен дел од текстот е посветен на европската интеграција на Северна Македонија. Дерала истакнува дека европската интеграција не може да се сведе на политички декларации, законодавни процедури или преговори со Брисел, додека институциите што треба да ги штитат европските демократски стандарди се ослабуваат дома.
„Една земја не може да тврди дека го брани својот идентитет на патот кон Европа, а истовремено да ги урива токму европските вредности што му даваат смисла на тој пат.“
Во анализата се упатува критика и кон пристапот на Европската Унија, со предупредување дека инсистирањето на краткорочна стабилност и формално исполнување на условите може да помогне да се одржува привидот на реформи, додека демократските институции се празнат однатре.
„Продлабочувањето на јазот меѓу проевропската реторика од политичките говорници и автократските тактики во судниците активно ја саботира европската иднина на Северна Македонија“, пишува Дерала.
Анализата заклучува дека цената на политичката контрола врз правдата на крајот ја плаќа целата земја – преку ослабени демократски институции, економска стагнација и сè понеизвесна европска иднина.
Прочитајте ја целата анализа на Voxeurop:
The cost of a captured judiciary in North Macedonia
Извор: CIVIL MEDIA
Неопходна е вашата поддршка за ЦИВИЛ.
Поддржете ги независните медиумски платформи на ЦИВИЛ во борбата против дезинформациите, национализмот, хибридните закани и авторитаризмот
Дајте го својот придонес СЕГА.
