Кошаркарската репрезентација на Македонија попладнево ја очекува вториот натпревар од претквалификациите за Светскиот куп 2027 во Катар. Македонија гостува кај Унгарија и по стартниот пораз во Куманово од Романија првата победа ќе се „брка“ на гостински терен.
Селекторот Марјан Илиевски за Унгарија, а потоа и за Романија ги однесе истите 15 играчи кои беа и во комбинација за дуелот во Куманово.
– Против Унгарија, треба да се држиме до планот, да играме агресивно во одбраната. И најбитно, да заградуваме под кошевите, бидејќи тоа беше најголемиот минус, зошто го загубивме натпреварот против Ромнија. Секако дека очекувам победа, бидејќи верувам дека можеме повеќе да дадеме. И мислам дека од тренинг во тренинг растеме како екипа бидејќи сме нова, млада екипа, така што очекувам се подобри и подобри резултати понатаму, изјави еден од најмладите во составот Андреј Митревски.
Натпреварот се игра „Тисалигети“ Арена во Солнок, од 18 часот, а ќе го судат Хулио Анаја од Панама, Александар Глишиќ од Србија и Мартин Вулиќ од Хрватска.
