„Јас сум предмет на црна кампања на ВМРО-ДПМНЕ повеќе години наназад,“ изјави претседателот на СДСМ, Венко Филипче, во интервју за телевизија Сител, одговарајќи на нападите на власта за неговиот приватен одмор. „Прво ми препишуваа некаква куќа во Нерези, па авиокомпанија во Дубаи, па стокатница во Дубаи, па сега еве јахта… Нема да се изненадам ако зимава застанат и се сликаат пред некоја куќа во Сент Мориц и кажат дека е моја,“ додаде тој.
Филипче потенцираше дека во отсуство на реални резултати, владејачката партија целосно се потпира на дезинформации и медиумски спинови:
„Немаат што да прават друго, поради тоа што апсолутно нема никаков перформанс во владата. Немаат со што да се пофалат, ги демонтираме во сите мерки и бројки.“
Според него, граѓаните веќе чувствуваат последици од неспособноста на власта: растечки цени, поскапени основни трошоци, слабост во економските политики и изостаната визија.
„Сметам дека оваа влада ќе оди во историјата како една фуснота, затоа што буквално ништо нема да направат,“ заклучи Филипче.
Социјалдемократскиот сојуз останува фокусиран на реалните проблеми и на борбата за економски и социјален напредок. Црните кампањи нема да го променат фактот дека граѓаните живеат сè потешко – и дека тоа е резултат на неспособна, расипничка и конфузна власт.
