Издавачката куќа „Или-Или“ ја објави стихозбирката „Совршен поет“ – книга со собрана поезија на Игор Исаковски (1970-2014) по повод 55 години од неговото раѓање, и ќе ја промовира вечер во кафе-книжарницата Буква од 20 часот.
-Во слава на поетот Игор Исаковски, на 55-годишнината од неговото раѓање. Книгата има 700 страници собрана поезија на еден од најзачајните и најпознати современи македонски поети, соопшти „Или-Или“.
Во првиот поговор на изданието, уредничката Елизабета Баковска вели дека препрочитувањето на поезијата на Исаковски за неа било „долготраен, тегобен и мачен, но едновремено и неверојатно просветлувачки процес“.
-Едно од оние животни искуства кои некако го менуваат човека. Читањето на овој обемен корпус стихови што се мрачни, љубовни, еротски, безобразни, сурови, цинични, алкохолизирани, повторливи, баладни, епски, сатирични, филозофски, осамени, гневни, возбудливи, ритмични, екстатични, телесни, отуѓени, бунтовни, помирливи, животворни, смртоповикувачки, разурнувачки, бесни, смирувачки, роморливи, обилни, но никако невпечатливи, рамнолиниски и занемарливи, беше едно повторно, длабоко медитативно соочување со она што за (во и од) Игор беше поезијата: „чувствено продирање низ суштината“, пишува Баковска.
Во вториот поговор на ова издание, Елизабета Шелева истакнува: „Никојпат не знаеме која песна ќе (ни) биде последна, заветна – и која песна (или книга) ќе ја втисне неизбежната есхатолошка точка на нечие творештво и, уште поважно, живот“.
-Кога станува збор за близок и драгоцен човек, одличен и посветен поет, бескомпромисен и огнен маж, граматиката одеднаш станува мошне сурова дисциплина. Како (одеднаш) да се говори за некого во минато време, како веќе еднаш да бил и никојпат повеќе нема да биде? Ова (студено граматичко време) особено паѓа тешко, кога тој исклучителен и редок човек заминал ненадејно, во својата полна животна и, уште повеќе, творечка сила, кога немал ниту едно бело влакно во бујната долга коса, ниту еден траг од толку блиската конечност… Оти премногу енергија, премногу супстанција, премногу живот, премногу „музики“, премногу прашања, што живот значат „полн сум сокови и стихови“ – му останале несподелени, недокажани, незаобиколни – да ги сподели со своите читатели-сојузници, од онаа страна на баналното, од онаа страна на рамнодушноста, од онаа страна на темницата и на небитието…, пишува Шелева во поговорот.
Фотографиите во книгата се на Сашо Димоски, дизајнот на корицата е на Марија Смилевска а графичкото уредување на Светлана Кочовска-Стеовиќ.
