Данската полиција соопшти дека дроновите, поради кои беше затворен главниот аеродром во земјата, најверојатно биле управувани од „способен оператор“, но сè уште нема идентификувани осомничени.
Данска и Норвешка денеска повторно ги отворија аеродромите, кои беа привремено затворени поради забележани дронови. Данската полиција не потврди кој тип или колку дронови биле видени во близина на аеродромот во Копенхаген.
– Не е познато од каде доаѓаа дроновите, ниту каде летаа откако беа забележани, изјави заменик инспекторот Јакоб Хансен.
Работата на аеродромот во Копенхаген продолжи околу 00:30 часот по локално време, по речиси четиричасовна пауза. Аеродромот во Осло исто така беше повторно отворен по околу четири часа затворен воздушен простор.
Синоќа биле забележани два до три големи дронови во близина на Копенхаген, што довело до прекин на сите полетувања и слетувања. На прашањето дали дроновите можат да бидат од руско потекло, Хансен одговори дека тоа не може да се потврди ниту да се негира.
Украинскиот претседател Володимир Зеленски на социјалните мрежи го спомна „руското нарушување“ на воздушниот простор на НАТО во Копенхаген на 22 септември, но не наведе извор. Според Flightradar24, најмалку 35 летови кон Копенхаген биле пренасочени поради затворање на аеродромот.
