По минатонеделниот протест „Ниту една повеќе“, движењето кое го организираше повторно повикува на блокада овој четврток (25 септември) на раскрсницата кај „Жена Парк Борец“ од 18 часот.
„Преку размена во јавен простор да го канализираме нашиот колективен гнев и заедно да дискутираме за решенија наспроти институциите кои ги загрозуваат нашите улици“, напишаа организаторите на социјалните мрежи, повикувајќи ги граѓаните да се придружат во заедничката борба против насилство врз жените.
Претходно од движењето „Ниту една повеќе“ иформираа дека го започнуваат ова движење „затоа што насилството врз жените и фемицидот не се поединечни „инциденти“ туку се последици од неказнивост и култура која поттикнува и оправдува насилство“.
„Делуваме во женска солидарност за да повикаме на одговорност и промена – законска, институционална, и општествена, за ниту една повеќе да не биде жртва“, велат од движењето.
Тие на социјалните мрежи се претставија како феминистичко движење кое се залага за еднаквост и живот без насилство.
„Не прифаќаме жените да бидат гледани само низ улогите што системот ги наметнува, туку се бориме за свет во кој достоинството, гласот и животот на секоја жена има вредност“, напишаа на социјалната мрежа Инстаграм.
Преземено: Нова ТВ
