Во 2023 година најмалку два странски јазици изучувале 6,4 отсто од учениците од основните и 59,5 проценти од учениците во средните училишта во ЕУ, соопшти денеска Европската статистичка агенција – Евростат по повод Европскиот ден на јазиците – 26 септември.
Споредено со 2013 година, стапката на основци кои изучувале два или повеќе странски јазици се зголемила за 1,8, а на средношколци за 1,1 процентни поени.
Единствена земја членка на ЕУ каде мнозинството основци или 78,9 проценти изучуваат најмалку два светски јазици е Луксембург. Далеку зад неа се Летонија со 37 отсто, Грција со 35,5 и Естонија со 34,9 проценти ученици во основните училишта што учат најмалку два странски јазици.
Најголем раст на стапката на изучување на најмалку два странски јазици во периодот 2013-2023 година има во Летонија од 22,1 процентни поени, пред Финска со 15,2, Грција со 9,6 и Шпанија со 8,3 процентни поени. Од друга страна, најголемо намалување на оваа стапка има во Полска од 6,5 и Луксембург од 4,9 процентни поени.
Во Хрватска и во Бугарија уделот на основици што изучуваат два или повеќе странски јазици во посочениот период од 10 години останал непроменет на 18,4, односно 1,5 отсто.
Кога станува збор за средношколците, лидерската позиција ја има Финска, каде најмалку два странски јазици изучуваат 97,8 отсто од учениците во средните училишта. По Финска следуваат Грција, Италија, Малта, Естонија, Романија и Португалија, каде оваа стапка се движи меѓу 96,6 и 93,2 проценти.
Најмал удел на изучување на најмалку два странски јазици има во Ирска од 5,4 отсто, по што следува Унгарија со 6,1 и Австрија со 7,6 проценти.
Во споредба со 2013 година, уделот на ученици во средните училишта што учат два или повеќе странски јазици најмногу се зголемил во Чешка за 24,8, пред Франција за 22 и Белгија за 18,2 процентни поени. Од друга страна, најголем пад на оваа стапка има во Полска од 42,8 процентни поени, по што следуваат Словенија со 33 и Словачка со 26,0 процентни поени.
