Пишува: ДРАГАН МИШЕВ
Претседателката Сиљановска – Давкова на приемот за лидерите од Западен Балкан што го приреди високата претставничка на ЕУ за надворешни работи и безбедносна политика Каја Калас, ја повтори мантрата за двојни стандарди што ги манифестира ЕУ, која сосема кореспондира со наративите на партијата чиј кандидат беше на претседателските избори, дека виновна е ЕУ, нели, и сите останати, само не и ние.
Продолжувајќи да дели лекции на европските функционери, претседателката, која патем, од летниот распуст во вилата во Охрид речиси директно летна во Њујорк, не осврнувајќи се на тековните проблеми со кои се соочуваат граѓаните во земјата каде што е претседателка, таа реши да замете во туѓиот двор, да им укаже дека треба да стават крај на, според неа, нивните двојни стандарди, карајќи ги дека тоа не е европски манир, не е европска пракса, не би требало да биде европска пракса … веројатно поттикната од европските манири со кои се служат таа и функционерите на власта кои ја кандидираа.
Значи, за мене е антиевропско однесување, но тоа постојано се практикува во Европската унија, кажа како ја замислува ЕУ претседателката Сиљановска – Давкова.
Давкова, на крајот, се иззема себе и Владата од понатамошни чекори кои треба да би преземе Северна Македонија за да го придвижи процесот на пристапување кон ЕУ, како ветените уставни измени, и префрлајќи ја топката во дворот на Унијата, таа нареди:
На потег се тие!
Демек ние нашето го завршивме, не барајте веќе ништо од нас, и клекнете на колена да не молите да влеземе во ЕУ.
Изјавите на претседателката веќе ги надминуваат и капацитетот и способностите на нејзиниот кабинет, вклучително и на кабинетот на Владата со сé МНР, и сé повеќе звучат како да се пишувани некаде посеверно од Северна Македонија, како на пример во кабинетот на Вучиќ во Белград.
А преку Белград , патот низ Будимпешта води до…
Преземено: Цивил Медиа
ЦИВИЛ МЕДИА | Ставовите и наодите во овој текст се целосна одговорност на авторите и не нужно ги претставуваат ставовите на донаторите или на другите партнери и соработници на организацијата.
