Европската Унија мора да се држи до својата стратегијата, а проширувањето е дел од таа стратегија и тоа е прашање е важно како за ЕУ, така и за целиот европски континент, порача данската премиерка Мете Фредериксен по завршувањето на состанокот на Европската политичка заедница во Копенхаген, на кој учествуваше и македонската претседателка Гордана Сиљановска-Давкова.
– Мора да изградиме што е можно посилна Европа, што, според мене, значи и проширување на Европската Унија, рече Фредериксен на заедничка прес-конференција со украинскиот претседател Володимир Зеленски.
Фредериксен нагласи дека 26 земји се согласуваат „дека Украина, Молдавија и другите земји“ треба да и се придружат на Унијата и не треба да се дозволи една држава да решава за европската иднина. – Мора продолжиме да се обидуваме да најдеме решение, но мислам дека мора да се држиме до стратегијата, додаде данската премиерка.
Зеленски, пак, истакна дека денеска на состанокот лидерите разговарале за европската иднина на Украина, на Молдавија и на Западниот Балкан и сите се согласиле дека Киев е подготвена за старт на преговорите за членство во ЕУ со отворање на Кластерот 1 – Основни вредности. – Важно е да се одржат ветувањата, додаде Зеленски.
Според него, никој не може да го блокира украинскиот пат кон ЕУ, затоа што одлука и волја на украинскиот народ е да ја види Украина како членка на Унијата.
– Патем, Русија и ја започна оваа војна поради нашата волја и нашиот избор е да одиме директно кон ЕУ, бидејќи се чувствуваме исто и ги споделуваме истите вредности со сите други европски земји, истакна Зеленски.
Фредериксен, од своја страна, потенцира дека на сите им е јасно оти Русија не е закана само за Украина, туку во последно време и за цела Европа, преку повреди на воздушниот простор, хибридни закани, миграциски притисоци на границите, мешање во демократските избори и кибер напади врз критичната инфраструктура.
– Европската политичка заедница ги зближува земјите од цела Европа, кои, се разбира, имаат различни ставови за многу различни прашања, но сите овие разлики веќе не се толку важни поради големиот предизвик што сите споделуваат – заканата од Русија кон Европа. Затоа нашата заедничка цел сега е едноставна – мора да можеме да се одбраниме и мора да ги браниме вредностите во кои веруваме, рече данската премиерка.
Потсетувајќи дека Европската политичка заедница беше формирана како директен одговор на руската агресија врз Украина, Фредериксен изрази задоволство што на денешниот собир е потврдена европската непоколеблива поддршка за земјата и за украинскиот народ.
– Русија не тестира повеќе од кога било досега. Треба да стоиме цврсто заедно и сега повеќе од кога било треба да ги здружиме силите за да изградиме посилна и побезбедна Европа, пред се преку зајакнување на нашата поддршка за Украина со оружје и со засилени санкции кон Русија, рече Фредериксен.
Таа нагласи дека на сите Европејци треба да им биде јасно дека „секое евро, долар или данска круна“ што и се испраќаат како помош на Украина, всушност се инвестиција во европската безбедност.
– Речиси четири години, вие и вашите сонародници ја браните Украина од масовната руската воена агресија, со што ја браните и Европа, изјави Фредериксен обраќајќи му се на Зеленски.
Данската премиерка додаде дека покрај во поддршката на Украина, Европа мора да инвестира и во зајакнувањето на сопствената одбрана со цел да биде толку силна што војна против неа повеќе не би било опција.
Зеленски оцени дека на денешниот состанок јасно се покажало дека Европејците се решени да одговорат на растечката закана што доаѓа од Русија.
– Руските дронови отидоа предалеку. Русија отиде предалеку со опасните инциденти во Данска, другите нордиски земји, Полска, Романија и балтичкиот воздушен простор. Сето ова покажува дека е потребна заедничка акција. Секоја европската земја треба да има можност да урива дронови, рече Зеленски.
Затоа, според него, е потребна заедничка акција за одбрана од дронови и независно од тоа како таа ќе се нарекува, таа треба да овозможи заштита на секоја европска земја од беспилотните летала и сите други закани од Русија.
– Русија прави многу грешки и затоа треба да го зголемиме притисокот сега, за да ја принудиме да ја прекине војната и да ја промени својата политика, додаде Зеленски.
Тој ги повика европските земји да ги ограничат набавките на руски енергенси и да ги ослабнат врските со Русија, бидејќи како што рече секоја врска на една земја со Москва може да биде искористена против неа.
Инаку, на почетокот на прес-конференцијата Фредериксен изрази сочувство до британскиот народ, еврејската заедница и британскиот премиер Кир Стармер поради, како што рече, „ужасниот инцидент“ во Манчестер. – Во овие тешки времиња моите мисли се со семејства на жртвите, нагласи Фредериксен.
