Денеска во Србија се одбележува 25-годишнината од големите демонстрации во Белград, со кои на 5 октомври 2000 година заврши владеењето на Слободан Милошевиќ. Тој јубилеј ќе биде одбележан утре во Белград во 10 часот наутро со трибина на плоштадот Дорќол, каде што ќе зборуваат поранешниот претседател на Србија Борис Тадиќ, новинарката Даница Вучениќ, професорот на Факултетот за политички науки Душан Спасојевиќ и студентката Николина Синѓелиќ.
Причината за демонстрациите беа тврдењата на претставниците на Демократската опозиција на Србија (ДОС) дека тогашната влада ги фалсификувала резултатите од изборите за претседател на Сојузна Република Југославија, на кои, според ДОС, нивниот кандидат Воислав Коштуница го победил Милошевиќ.
На повик на тие опозициски партии, на 5 октомври, граѓаните се собраа на платото пред тогашното Сојузно собрание од цела Србија во километарски колони од автомобили, автобуси и камиони, пробивајќи ги полициските блокади на одредени патишта со булдожери.
Полицијата употреби претпладнето солзавец за да ги спречи демонстрантите да влезат во зградата на Собранието, но учесниците на протестот сепак ја демолираа таа зграда, како и зградата на Радио и телевизија на Србија на улица Таковска во Белград.
Полицијата набрзо престана да се спротивставува и во голем број им се придружи на демонстрантите.
Вечерта на 5 октомври 2000 година, граѓаните беа пречекани од новиот претседател на СРЈ, Воислав Коштуница, од терасата на Белградското собрание, а следниот ден, 6 октомври, Милошевиќ го призна својот изборен пораз и му честиташе.
Во демонстрациите беше убиена Јасмина Јовановиќ од Милошевац кај Велика Плана, која падна под тркалата на камион. Момчило Стакиќ од Крупањ почина од срцев удар, а вкупно 65 лица беа повредени.
ДОС практично престана да постои недолго по преземањето на власта, а тогашните учесници во владата на Слободан Милошевиќ повторно ги заземаат најважните позиции во Србија. Многу од нив се уште се на важни позиции денес – тогашниот министер за информации во Владата на Србија, Александар Вучиќ, е сегашен шеф на државата.
Додека самиот Коштуница се повлекуваше од политиката, вториот лидер на ДОС, реформистот Зоран Ѓинѓиќ, како премиер на Србија, беше убиен на 12 март 2003 година.
Слободан Милошевиќ почина во 2006 година во затворот во Хаг, каде што беше суден по обвинение за воени злосторства, а неговата сопруга и поранешна претседателка на ЈУЛ, Мирјана Марковиќ, почина во егзил во Русија.
