Американскиот министер за одбрана Пит Хегсет привлече внимание на социјалните мрежи поради вратоврската во боите на руското знаме што ја носеше на средбата меѓу претседателите на Украина и САД, Володимир Зеленски и Доналд Трамп.
Хегсет се појави на средбата носејќи вратоврска во боите на руското знаме – бела, сина и црвена – и марамче во боите на американското знаме, а комбинацијата на овие бои, кои ги симболизираат знамињата на двете земји, предизвика бројни коментари во медиумите и на социјалните мрежи, јавуваат американските медиуми.
Средбата на претседателите на Украина и САД започна со кратко обраќање до новинарите, по што двајцата лидери ги продолжија разговорите зад затворени врати, кои траеја два часа.
Хегсет, кој е на чело на Пентагон од почетокот на мандатот на Трамп, не коментираше за симболиката на неговата модна комбинација, но корисниците на социјалните мрежи коментираа дека контрастот помеѓу вратоврската и марамчето изгледа „намерно нагласен“ во време кога американската администрација се обидува да го избалансира притисокот од Киев за испорака на американски ракети „Томахавк“ во Украина и одржувањето дипломатски канали со официјална Москва.
