Врз основа на извештаи од извршен мониторинг над изборното медиумско претставување, Советот на Агенцијата на денешната 14 седница одлучи да поведе прекршочни постапки против ТВ Компани 21-М и ТВ Шутел поради прекршување на изборниот молк во првиот круг од Локалните избори 2025.
Како што соопшти АВМУ, спротивно на Изборниот законик, ТВ Компани 21-М вчера (18 октомври), на првиот ден од изборниот молк, емитувала реприза на посебната информативна програма Клик плус – Изборни дебати, премиерно емитувана на 17 октомври.
-Реализирана како дебата во која учествуваат тројца кандидати за градоначалник на Општина Центар, односно емитуваше информации и аудиовизуелни материјали во кои учествуваат учесници во изборите, наведува Агенцијата во соопштение.
ТВ Шутел, пак, вчера и денеска (18 и 19 октомври) за време на двата дена од изборниот молк „емитува информации и аудиовизуелни материјали во кои учествуваат учесници во изборите, односно емитуваше музички спот и документарна емисија во кои се појавува кандидат за градоначалник на Општина Шуто Оризари“.
