Нема дел од државата во којшто не поминавме во оваа кампања и нема ниту една категорија на граѓани кои се задоволни од владеењето на ВМРО-ДПМНЕ, истакна претседателот на Социјалдемократскиот сојуз на Македонија, д-р Венко Филипче, на вчерашниот граѓански собир во Конче.
Филипче посочи дека за година и пол владата на ВМРО-ДПМНЕ не ги зголеми платите , ниту пак им помогна на граѓаните во услови кога цените на храната растат од месец во месец.
„Работниците немаат зголемување на платите. Трошоците за храна, трошоците за живот растат без контрола. А владата не прави ништо да ги исконтролира, иако има механизми за тоа. Единствената причина зашто оваа влада не го прави тоа е поради тоа што не се грижи вистински така како што треба ниту за државата, ниту за граѓаните“, рече Филипче.
Тој додаде дека ВМРО-ДПМНЕ не исполни ниту едно ветување, работниците, пензионерите, младите, земјоделците – сите се излажани од власта.
„Пензионерите се прелажани, им ветуваа лани поголеми пензии. Ги предупредувавме дека линеарното зголемување на пензиите не е добро за системот, дека не е одржливо. И што се случи со сегашното зголемување, наместо потребните и тоа што следуваше 2.000 денари, пензионерите добија само 1.000. И дополнително на тоа ја загрозија, стабилност на пензискиот фонд. Земјоделците се целосно излажани. Сточарите со помала субвенција за грло добиток. Тутунарите без соодветно зголемување по класи на тутунарите. Лозарите без никакво зголемување, субвенција по килограм грозје. Секоја наша предложена мерка ја одбија. Предложивме 3 денари дополнително за килограм грозје, го одбија“, рече Филипче.
Во обраќањето, Филипче потсети дека СДСМ и во најголемите кризи, ковид кризата и енергетската криза, беше заштитен и помогнат секој граѓанин, а беа поддржани и компаниите.
„Ниту еден граѓанин не оставивме по страна. Не дозволивме да пропадне ниту една компанија. Над 2 милијарди евра отидоа како директна помош за граѓаните. 80 илјади работни места се зачуваа, 20.000 компании се зачуваа, над 600 илјади семејства имаа помош за сметките за струја. И ако оваа можело да се направи за време на такви едни кризи, нема ниту една причина сега да не се направи, кога нема никаква криза“, посочи претседателот на СДСМ, Венко Филипче.
