По укинувањето на американските санкции за Милорад Додик на 30 октомври, сенаторот Чак Грасли порача дека САД ќе ја следат секоја можност за дестабилизација во БиХ и ќе инсистираат на почитување на Дејтон.
Американскиот сенатор Чак Грасли, во обраќање во Сенатот, ја поздрави одлуката за укинување на санкциите како признание за одредени чекори на деескалација од страна на Додик, но нагласи дека принципите на САД остануваат непроменети: стабилност, мир и почитување на Дејтон. „Јас сум за наградување на вакво добро однесување“, рече Грасли, додавајќи дека има „многу добри причини да веруваме дека господин Додик не ги сменил своите намери“, објави Klix.ba.
Грасли потсети на претходните закани со отцепување и речникот што го релативизира постоењето на БиХ, предупредувајќи на контакти и симболика што будат загриженост на Запад. Како пример, тој го спомна фотографирањето со Сергеј Лавров.
„САД внимателно ќе следат дали навистина ќе се држи до вистинскиот пат“, нагласи Грасли.
Сенаторот порача и дека лично ќе реагира доколку види ризик за мирот: „Овој сенатор будно ќе мотри на секоја дестабилизирачка акција што го загрозува мирот во Босна.“ Тој додаде: „Ќе работам со администрацијата на претседателот Трамп за да се осигураме дека сите актери го почитуваат Дејтонскиот мировен договор.“
Хронологија на падот на Додик
По барањето на Обвинителството на БиХ во февруари 2025 за затворска казна и десетгодишна забрана за политичка дејност за Милорад Додик, случајот влезе во забрзана фаза, при што неколку дена подоцна Судот му ја испрати писмената пресуда и рок за жалба. Во август, ЦИК БиХ едногласно му го одзеде мандатот по правосилната пресуда, што отвори бран од политички реакции и европски апели — Европската комисија јавно повика на почитување на судската одлука и спроведување предвремени избори согласно Изборниот закон.
Паралелно, есента ја одбележаа дипломатски тензии и безбедносни предупредувања, вклучително најави за руска поддршка и повици НАТО да предупреди дека секоја закана за сецесија е опасна, а темата влезе и во фокус на Советот за безбедност на ОН, со очекувања за расправа за мандатот на ЕУФОР.На 29/30 октомври уследи пресврт: OFAC ги укина американските санкции за Додик (заедно со повеќе лица/субјекти), што дополнително ги разгори расправите за стабилноста во БиХ и регионалните импликации. Ден потоа, во контекст на седницата на СБ на ОН за БиХ, ЦИВИЛМедиа нотира дека Додик очекува поддршка од Русија — сигнал дека меѓународниот и безбедносен аспект останува суштински фактор во следните чекори.
Д. Тахири / Цивил Медиа
