Астрономите со децении ги сметаа Плејадите – познати и како „Седумте сестри“ во соѕвездието Бик – за компактен и добро проучен ѕвезден кластер. Но ново истражување предводено од тим од Универзитетот на Северна Каролина во Чапел Хил покажува дека тие се само густото јадро на многу поголема ѕвездена структура.
Според студијата, објавена во The Astrophysical Journal, Плејадите се централниот дел на џиновски „семеен“ комплекс што се протега скоро 1.950 светлосни години. Истражувачите го нарекуваат „Поголемиот комплекс Плејади“ (Greater Pleiades Complex).
Комбинација од три големи вселенски мисии
Тимот ги споил податоците од три големи астрономски проекти:
NASA TESS – за мерење на ротацијата на ѕвездите преку промени во нивниот сјај
ESA Gaia – за прецизни позиции и движења на ѕвезди низ Галаксијата
SDSS (Sloan Digital Sky Survey) – за хемиски состав добиен од спектроскопски мерења
Со комбинирање на ротациите (што ја открива староста), орбиталните движења и хемиските „отпечатoци“, научниците откриле многу поголема популација на ѕвезди кои се движат заедно со Плејадите, го делат истиот хемиски состав и имаат иста возраст.
„Како склопување сложувалка“
Првиот автор, Ендру Бојл, објаснува дека ниту еден сет на податоци сам по себе не би го открил комплексот:
„Кога ги интегриравме – движењата од Gaia, ротациите од TESS и хемијата од SDSS – се појави кохерентна структура. Беше како да составуваме сложувалка, каде секој податок е едно парче.“
Откриени најмалку три познати групи – и уште две потенцијални
Коавторот Д-р Лук Боумa од Carnegie Observatories истакнува:
„Го нарекуваме ова Поголемиот комплекс Плејади. Вклучува најмалку три претходно познати групи на ѕвезди, а веројатно и две други. Нашите анализи покажуваат дека најголем дел од овие ѕвезди потекнуваат од истото џиновско ѕвездено родилиште.“
Хемијата го потврдува сродството
Ѕвездите кои се раѓаат заедно ја наследуваат истата „хемиска кујна“. Новите спектроскопски податоци од SDSS покажуваат дека членовите на поширокиот комплекс имаат речиси идентични хемиски карактеристики– цврст доказ дека се „братучеди“ со Плејадите.
Променета слика за најпознатиото ѕвезден кластер
Плејадите со векови се репер во астрономијата за мерење на раздалечености и старости на ѕвезди. Но ова истражување го менува контекстот:
повеќе не се самостоен кластер
туку централниот, најгуст дел од огромна, разлеана ѕвездна семејна структура
стара околу 100 милиони години
Овој нов модел ќе им помогне на астрономите подобро да го реконструираат раѓањето и растурањето на ѕвездените кластери низ Млечниот Пат.
Отворање пат за откривање нови „скриени семејства“
Методологијата – комбинирање на ротација, движење и хемија – ќе може да се користи за пронаоѓање на многу други древни, распрснати ѕвездени семејства низ нашата галаксија.
Д-р Боумa додава:
„Плејадите играат централна улога во астрономијата уште од античко време. Ова истражување е голем чекор кон разбирање на тоа како ова јато се менувало во последните сто милиони години.“
Редакција Фронтлајн
