Актерот Меколи Калкин, кој со улогата на Кевин Мекалистер стана икона на поп-културата, изјави дека „не би бил целосно алергичен“ на идејата повторно да се појави во серијалот „Сам дома“. Како што пренесуваат медиумите, Калкин нагласил дека враќањето би имало смисла само ако приказната биде направена на вистински начин, а откри и дека веќе има сопствена визија за можен продолжеток.
Според идејата што ја сподели, Кевин Мекалистер во новото издание би бил возрасен, татко што минува низ тежок период во животот – или како вдовец, или како разведен родител. Поради обврските и работата, тој не посветува доволно внимание на своето дете, што доведува до нарушен однос меѓу нив. Во симболичен и ироничен пресврт, детето го заклучува таткото надвор од домот и почнува да му поставува замки, токму како што Кевин тоа го правеше со крадците во оригиналниот филм.
Калкин вели дека во оваа верзија, Кевин практично би ги „заменил“ крадците, а куќата би станала метафора за односот татко-син, простор во кој главниот лик мора да научи како повторно да го пронајде патот до срцето на своето дете. Идејата, според него, има емотивна тежина и потенцијал за поинаков, позрел тон, без да се изгуби духот на оригиналот, пишува српски Danas.
Франшизата „Сам дома“ го претвори Калкин во една од најголемите детски филмски ѕвезди во раните 1990-ти, а првиот филм оствари заработка од 476 милиони долари на светско ниво. Тој се појави и во продолжението од 1992 година, кое исто така стана празничен класик.
Сепак, режисерот Крис Коламбус, кој ги режираше првите два дела, одамна изразува резерви околу било какво ново оживување на приказната. Тој смета дека „Сам дома“ е продукт на еден специфичен момент во времето и дека тоа чувство не може повторно да се создаде. Според него, би било грешка да се обидеме да повториме нешто што функционирало совршено пред повеќе од три децении и дека франшизата треба да се остави во мир.
Ниту Калкин, ниту Коламбус не беа дел од третиот филм од 1997 година, ниту од четвртиот, кој беше телевизиско издание во 2002 година. Disney се обиде да ја оживее франшизата во 2021 година со нов филм, но тој обид беше дочекан со исклучително лоши критики и не успеа да го освои ниту публиката, ниту критичарите.
Прашањето дали „Сам дома“ некогаш ќе добие продолжение со оригиналниот Кевин останува отворено, но јасно е дека – ако се случи – тоа би било сосема поинаков филм од оној што го паметат генерациите.
