Креаторите на „Stranger Things“ им праќаат смирувачка порака на милионите обожаватели ширум светот: големото финале на серијата нема да заврши во стилот на „Игра на тронови“ и публиката, велат, не треба да стравува од разочарувачки крај.
По речиси една деценија на малите екрани, хит-серијата на „Netflix“ влегува во својата последна, петта сезона. Фановите, научени од искуството со некои други големи ТВ-франшизи, се прашуваат каква судбина ги чека нивните омилени ликови и дали крајот ќе биде достоен на култниот статус што „Stranger Things“ го стекна во поп-културата.
Последната сезона пристигнува во неколку дела: првиот дел веќе е објавен на 26 ноември, вториот се очекува за Божиќ, а финалната епизода е најавена за Нова година. Долгата пауза од претходната сезона, емитувана во 2022 година, само ги зголеми очекувањата – но и нервозата – кај гледачите.
Многумина стравуваат од повторување на сценариото на „Game of Thrones“, глобален ТВ-феномен чијашто завршна сезона во 2019 година беше жестоко критикувана поради недоволно разработени разврски и контроверзни одлуки за клучните ликови. Негативниот одѕив кулминираше со онлајн петиција за повторно снимање на осмата сезона, потпишана од повеќе од 1,8 милиони луѓе – пример што работењето на браќата Дафер очигледно сакаат да го избегнат.
Во разговор за Variety, Мет Дафер, еден од креаторите на „Stranger Things“, директно одговори на прашањето дали финалето ќе биде „крваво“ и шокантно. „Веќе реков – ова не е ‘Game of Thrones’“, порачува тој. За дополнително да ги смири фановите, додава: „Се надевам дека луѓето ќе бидат изненадени. Но нема ‘Црвена свадба’, ако на тоа мислите. Тоа би било навистина депресивно.“ Со оваа изјава, Дафер јасно стави до знаење дека серијата нема да оди по патот на масовни ликвидации и мрачни пресврти какви што влегоа во историјата на телевизијата преку „Игра на тронови“.
Во друго интервју, за Hollywood Reporter, Дафер зборува и за односот кон фан-теориите што преплавуваат социјални мрежи и форуми во пресрет на финалето. „Забавно е да се читаат сите тие теории за тоа што ќе се случи. Повеќето се погрешни. Повремено, некој ќе погоди нешто“, вели тој низ смеа. Истовремено, ги охрабрува гледачите да не се опседнуваат со предвидувања, туку да ѝ дозволат на приказната природно да ги води.
„Секако дека луѓето ќе имаат очекувања и се надеваме дека ќе ги оправдаме. Но би сакал да влезат во сезоната како и во секоја досега – и да ѝ дозволат на приказната да ги поведе“, вели Дафер. Неговата порака е едноставна и домашна: „Земете малку чоколаден пудинг, чипс или пуканки – што и да ви треба – и само уживајте.“
Со ваквите изјави, авторите на „Stranger Things“ се обидуваат однапред да ја намалат тензијата и да навестат дека крајот ќе биде емотивен и силен, но не и разорувачки на начин на кој дел од публиката уште со горчина се сеќава кога зборува за „Game of Thrones“. За фановите на Хокинс, пораката е јасна: очекувајте изненадувања, но не и телевизиски шок од кој ќе барате петиција за „повторно снимање“.
Редакција Фронтлајн
