Во Загреб, Риека, Пула и Задар денеска се одржаа протестни маршеви во организација на иницијативата „Обединети против фашизмот“, со цел јавно спротивставување на екстремизмот, историскиот ревизионизам и говорот на омраза, пренесува Index.hr.
Како што објавија – во Загреб се собраа најмногу луѓе, неколку илјади, а околу илјада се собраа во Риека и Пула, додека неколку стотици се собраа во Задар
Во Задар настанот беше проследен со инцидент уште пред официјалниот почеток. Група млади лица, облечени во црно и со маски и извикувале националистички пароли и ја пееле песната „Зови, само зови“.
Според медиумските извештаи, во еден момент дошло до турканици меѓу групата и припадниците на интервентната полиција. Инцидентот ескалирал накратко, по што полицијата употребила надразнувачки спреј, со што судирот бил прекинат, а групата се разотишла.
Дел од учесниците во оваа група носеле транспаренти со натписи како „ХОС е наша гордост“, „Југославија е мртва“ и „1991 година Хрватска ја нападнаа антифашистите“ – пораки кои предизвикаа дополнителни реакции и осуди на социјалните мрежи.
Од организаторите на протестите порачаа дека маршевите се одржуваат со цел да се зачуваат антифашистичките вредности како темел на современа Европа и да се укаже на порастот на екстремистичка реторика и симболика во јавниот простор.
Од полицијата соопштија дека ја следеле состојбата во сите градови и дека ќе ги анализираат настаните во Задар, вклучително и транспарентите и извикувањата, со цел да се утврди дали постојат елементи за понатамошно постапување согласно законот.
Редакција Фронтлајн
