Пет лица се уапсени поради противправно однесување за време и по антифашистичкиот марш „Обединети против фашизмот“, кој викендов се одржа во Риека. На маршот учествуваа повеќе од илјада граѓанки и граѓани, кои испратија порака на отпор кон фашистичките тенденции и ескалацијата на насилството во општеството, пренесува хрватски Index.
Првиот инцидент бил регистриран пред почетокот на собирот, кога група од околу триесетина помлади, претежно маскирани лица, вербално ги нападнале учесниците и фрлале пиротехнички средства. Полицијата ја држела групата на одредено растојание и ја потиснала кон улицата Чиотина. По завршувањето на маршот, маскирани лица облечени во црно фрлале факели кон учесници кои се наоѓале во угостителски објект, по што избегале, а на местото интервенирала полицијата.
Од Полиција на Хрватска соопштија дека настанот бил сниман согласно Законот за полициски работи и овластувања и дека е идентификуван поголем број лица поврзани со противправни дејствија. Пет уапсени лица се наоѓаат во полициски простории и против нив е во тек криминалистичко истражување. Како што наведуваат од полицијата, недозволени однесувања биле забележани и при почетокот на јавниот собир и по неговото завршување, а јавноста ќе биде навремено информирана за исходот од истрагата.
Организаторите на маршот, Иницијативата „Граѓанки и граѓани на Риека“, оценуваат дека полицијата не ја обезбедила соодветно безбедноста и дека имало сериозни пропусти. На прес-конференција во Риека, Ана Јурчиќ изјави дека полицијата дозволила неприjавено и насилно собирање на, како што рече, фашистичка група која извикувала забранети усташки пароли, величела тоталитарен режим и фрлала пиротехнички средства, при што било повредено дете. Таа додаде дека по завршувањето на собирот била фрлена запалива направа кон присутните граѓани, при што била повредена уште една личност.
Според Јурчиќ, ваквото однесување претставува прекршување на Законот за јавно собирање, Законот за прекршоци против јавниот ред и мир и Кривичниот закон. Таа нагласи дека насилниците биле свесни дека го кршат законот, бидејќи на јавен простор дошле маскирани со цел да го сокријат идентитетот.
Иницијативата најави поднесување кривични и прекршочни пријави против сторителите, како и пријави за полициското постапување до надлежните институции и до правобранителот, со цел да се испита одговорноста и да се спречат слични инциденти во иднина.
Критики упати и претседателот на Задругата на антифашистички борци и антифашисти Риека, Војко Оберснел, кој ја оцени реакцијата на полицијата како неразбирливо блага. Тој праша кого и како полицијата штити и предупреди дека ваквите инциденти го потврдуваат значењето на протестот и ја отвораат дилемата за безбедноста на граѓаните на мирни и законски собири.
