Калифорниски лекар кој му набавувал кетамин на холивудскиот актер Метју Пери е осуден на 30 месеци затвор, со што стана првата личност што доби затворска казна поврзана со смртта на актерот од предозирање.
Д-р Салвадор Плазенсија беше еден од петмината обвинети во федералната истрага која откри нелегална мрежа преку која Пери доаѓал до анестетикот кетамин. За пресудата пренесува Би-Би-Си.
Пери, на 54-годишна возраст, беше пронајден мртов во својата хидромасажна када во Лос Анџелес во 2023 година, по долгогодишна борба со депресија и зависност. Најпознат беше по улогата на Чендлер Бинг во серијата Пријатели, а јавно говореше за своите проблеми со зависноста.
Уште четворица обвинети
Плазенсија минатото лето призна вина по четири точки од обвинението за илегална дистрибуција на кетамин, за што му се закануваше максимална казна до 40 години затвор. Обвинителството побара тригодишна затворска казна.
Останатите четворица обвинети – меѓу кои уште еден лекар, негов асистент и две лица кои ја набавиле смртоносната доза – исто така признале вина. Нивните пресуди се очекуваат во наредните месеци.
Признавање вина и изразено каење
Во писмо испратено до судот минатиот месец, Плазенсија се извини и рече дека целосно ја прифаќа одговорноста за своите постапки, нагласувајќи дека направил сериозна професионална грешка.
Тој наведе дека неговата клиника имала финансиски проблеми и оти, иако бил свесен за знаците на зависност кај Пери, понудата на големи суми пари била „примамлива“. По апсењето, доброволно ја предал својата медицинска лиценца.
Како функционирала нелегалната мрежа
Кетаминот може да се администрира исклучиво под лекарски надзор. Судските документи покажуваат дека Пери првично го добивал легално како терапија за депресија, но подоцна започнал да бара поголеми количини.
Истражителите утврдиле дека тоа го одвело до повеќе лекари и до жена која обвинителството ја нарекува „кралица на кетаминот“, која од својот дом во Лос Анџелес дистрибуирала големи количества наркотици.
Според обвинението, Плазенсија му давал кетамин на актерот во неговиот дом, како и на паркинг кај аквариум во Лонг Бич. Тој дури го обучил и асистентот на Пери – Кенет Ивамаса – како да ја администрира дрогата. Во периодот меѓу 30 септември и 12 октомври 2023 година, биле продадени дваесет шишенца кетамин, пастили и шприцеви.
Обвинителите заклучија дека обвинетите свесно ги искористиле проблемите на актерот со зависност за лична корист.
