Исландската национална радиотелевизија RÚV објави дека земјата ќе го бојкотира Евросонг 2026, во знак протест против одлуката на Европската радиодифузна унија (EBU) да му дозволи учество на израелскиот јавен сервис KAN, пренесува Euronews.
Одлуката на Исланд доаѓа само една недела по повлекувањето на уште четири европски земји – Шпанија, Холандија, Словенија и Ирска, кои исто така се спротивставија на присуството на Израел на натпреварот во услови на војната во Газа.
Генералниот директор на RÚV, Стефан Еириксон, во официјалното соопштение наведува дека одлуката на EBU предизвикала длабоки поделби во општеството.
View this post on Instagram
„Со оглед на јавната дебата и реакциите по одлуката на EBU, јасно е дека ниту радост ниту мир нема да преовладуваат ако RÚV учествува на Евросонг. Затоа решивме да ја известиме EBU дека Исланд нема да учествува следната година“, се вели во соопштението.
Локалните медиуми јавуваат дека голем број граѓани се собралe пред седиштето на RÚV во Рекјавик за да ја поддржат одлуката.
Не е јасно дали во 2026 ќе се одржи Söngvakeppnin, националниот избор преку кој Исланд традиционално го одбира својот претставник.
Одлуката на Исланд следува по сличните потези на уште четири држави, кои својот бојкот го најавија по состанокот на EBU, на кој се дискутирало – но не се гласало – за учеството на Израел.
Холандскиот јавен сервис AVROTROS соопшти дека учеството на Израел „повеќе не е во согласност со одговорностите на јавен сервис“, додавајќи:
„Културата поврзува, но не по секоја цена… Универзалните вредности како човечност и слобода на медиумите се сериозно повредени.“
Слична позиција изрази и шпанската RTVE, чиј генерален секретар Алфонсо Моралес изјави дека постојат „сериозни сомнежи“ во врска со учеството на KAN.
Евросонг – кој го следат повеќе од 100 милиони гледачи годишно – веќе две години е под силно влијание на конфликтот меѓу Израел и Хамас. На последната седница на EBU, дел од јавните сервиси бараа исклучување на Израел, не само поради војната, туку и поради обвиненија за манипулирање со гласањето.
EBU воведе построги правила за гласање, но задржувањето на Израел ги поттикна новите бојкоти.
Евросонг аналитичарот Пол Џордан, познат како „Dr. Eurovision“, предупредува:
„Натпреварот станува рaсцепкан. Слоганот е ‘Обединети преку музиката’, а реалноста е дека сме разединети поради политиката… Ситуацијата станува токсична.“
Прочитајте и…
