Објавувањето на најновиот пакет документи од таканаречените Епштајнови списи предизвика силни реакции во САД, откако стотици страници беа објавени речиси целосно или делумно зацрнети. Дел од критиките доаѓаат и од демократите и од републиканците, а не се исклучува ниту можноста американскиот Конгрес да покрене тужба против Министерството за правда.
Поранешниот федерален обвинител Пол Пелетие изјави за Sky News дека објавата е „прилично разочарувачка“ и дека степенот на редакции оди подалеку од она што го бара законот. Според него, документите поврзани со Бил Клинтон се ставени во прв план, додека оние што се однесуваат на Доналд Трамп не се истакнати на ист начин.
„Конгресот, кој со закон наложи објавување на овие списи, најпрво ќе се обиде да го реши прашањето дипломатски. Но, ако тоа не успее, ќе мора да оди на суд и да побара судска наредба со која Министерството ќе се принуди на соодветно редигирање и забрзување на објавата“, изјави Пелетие.
Стотици целосно зацрнети страници
Според NBC News, во најновиот пакет документи повеќе од 680 страници се целосно зацрнети. Еден документ од 119 страници, кој содржи сведочења пред голема порота, е објавен без ниту една видлива информација.
Лидерот на демократите во Сенатот, Чак Шумер, остро реагираше, оценувајќи дека „објавувањето куп целосно зацрнети страници е кршење и на духот на транспарентноста и на самиот закон“. Критики дојдоа и од дел од републиканците. Конгресменката Марџори Тејлор Грин порача дека ваквиот начин на објава „не е MAGA“, алудирајќи на ветувањата за целосна транспарентност.
Објаснување од Министерството за правда
Од Министерството за правда тврдат дека редакциите се неопходни за заштита на жртвите и поради активни истраги. Федералниот обвинител за Јужниот округ на Њујорк, Џеј Клејтон, во писмо до судиите кои ги надгледуваат предметите Епштајн и Максвел објасни дека лицата на жените на фотографиите се зацрнети дури и кога не е утврдено дека сите се жртви.
„Заштитата на приватноста на жртвите налага да се зацрнат лицата на жените на фотографиите со Епштајн, бидејќи за Министерството не е изводливо да се утврди идентитетот на секоја личност на секоја фотографија“, наведува Клејтон, признавајќи дека ваквиот пристап може да се смета за претерано зацрнување.
Реакции од жртвите
Преживеаните жртви, сепак, изразија незадоволство. Лиз Стајн изјави за BBC дека сака сите докази за злосторствата да бидат целосно објавени. Марина Ласерда, која била злоупотребувана како 14-годишна, оцени дека голем дел од редакциите се непотребни и дека на тој начин се штитат моќни луѓе.
Во меѓувреме, на Јутјуб се појави видео во траење од речиси три часа, во кое се прикажани сите 3.950 најново објавени фотографии од Епштајновите списи, што дополнително ја зголеми јавната дебата околу транспарентноста и обемот на редакциите.
Редакција Фронтлајн
Прочитајте и…
