Голем прекин на електричната енергија во Сан Франциско денеска доведе до неочекуван, но симптоматичен колапс на целосно автоматизираниот транспорт. Автономните такси-возила на компанијата Waymo беа принудени целосно да го прекинат сервисот, откако дел од градот остана без струја, а семафорите престанаа да функционираат.
Според локалните власти и енергетската компанија PG&E, прекинот бил предизвикан од пожар во електро-подстаница, поради што без струја останале над 130.000 корисници во различни делови на градот. Во услови на нефункционална инфраструктура, автономните возила на Waymo едноставно застанале на коловозите, некои од нив и на раскрсници, со вклучени алармни светла, пренесуваат американските медиуми.
Компанијата потврди дека привремено го суспендира сервисот во Сан Франциско, нагласувајќи дека безбедноста е приоритет и дека системите не се дизајнирани да функционираат во услови на целосен колапс на градската инфраструктура. На социјалните мрежи и во медиумите се појавија снимки од автономни такси-возила што стојат неподвижно, создавајќи сообраќајни застои и конфузија кај возачите и пешаците.
Иако нема пријавени повредени, настанот повторно ја отвори дебатата за ранливоста на целосната автоматизација и зависноста од стабилна енергетска и дигитална инфраструктура. Сценариото од Сан Франциско, често промовиран како „град на иднината“, покажа дека кога системите се меѓусебно целосно поврзани, еден дефект може да предизвика домино-ефект.
Настанот се случува во период кога Waymo и други компании интензивно го прошируваат автономниот превоз во американските метрополи, додека регулаторите сѐ уште се обидуваат да ја стигнат технологијата со соодветни безбедносни и кризно-управувачки протоколи.
Редакција Фронтлајн
