По низа свадбени свечености во изминатите месеци, легендарната тенисерка Венус Вилијамс (45) официјално потврди дека стапи во брак со италијанскиот актер и продуцент Андреа Прети (37), со кого е во врска од 2024 година.
Парот првпат го изговорил судбоносното „да“ на интимна церемонија во септември 2025 година на италијанскиот остров Ишија, локација која првично ја замислиле како место за главната свадба. Сепак, административните процедури за странски државјани во Италија ги принудиле да ја променат динамиката на прославата.
„Имавме сон свадбата да биде во Италија, но документацијата трае и до осум месеци. Затоа решивме да имаме повеќе церемонии“, изјави Вилијамс за Vogue.
Повеќедневна свадбена прослава во САД
Само три месеци подоцна, двојката ја одбележа својата љубов со голема, повеќедневна свадбена прослава во Палм Бич, Флорида. Настаните започнале шест дена пред главната церемонија, со семејна прослава на јахта, организирана од сестрата на Венус – Серена Вилијамс.
Следеле девојачка забава со будоар-тема, свечена вечера во ексклузивен клуб во Мајами, спортски ден со натпревари, како и низа приватни забави покрај базен во домот на парот.
На 20 декември, Венус и Андреа и формално го озакониле бракот на приватна церемонија во Градската куќа во Мајами.
„Не можам да опишам колку беше убаво, мирно и возвишено. Беше сон“, изјави Венус, додека Прети додаде дека токму таа церемонија за него била „длабоко емотивна и единствена“.
Венчаница по мерка и завети на два јазика
За финалната церемонија во нивниот дом, повеќекратната Grand Slam шампионка до олтарот чекорела со песната „Ovunque Sarai“ од италијанскиот пејач Ирама, облечена во венчаница по мерка на дизајнерот Жорж Хобеика.
Свадбената придружба, меѓу која и сестрите Серена Вилијамс, Иша Прајс и Линдреа Прајс, носела елегантни костуми по мерка, додека гостите од страната на младоженецот биле облечени во порелаксиран стил.
Парот сам ги напишал своите завети – Венус ги изговорила и на италијански и на англиски јазик, како симбол на нивната заедничка приказна.
По свечениот чин, младенците влегле на приемот со песната „Signed, Sealed, Delivered“ од Стиви Вондер, а првиот танц го одиграле на „I Only Have Eyes for You“ од групата The Flamingos. Прославата продолжила до раните утрински часови.
„Тоа беше најсреќниот и најубавиот ден“, изјави Венус Вилијамс.
