Градоначалникот на Град Скопје, Орце Ѓорѓиевски, на денешната седница на Советот, на која се разгледуваше Буџетот на Град Скопје за 2026 година, изјави дека градот бил затекнат со катастрофална финансиска и институционална состојба, но дека во краток период се постигнати резултати кои водат кон стабилизација и одговорно управување, соопштуваат од Град Скопје.
Ѓорѓиевски посочи дека по преземањето на функцијата, на сметката на Град Скопје имало само 40 милиони денари, додека денеска, според неговите зборови, состојбата изнесува 400 милиони денари. Тој наведе дека уште првиот работен ден од мандатот биле затекнати извршни решенија за наплата од 48 милиони денари, како и дополнителни три милиони денари по основ на спогодби.
Градоначалникот истакна дека во претходниот период, за девет месеци биле реализирани приходи од околу 2,85 милијарди денари, што претставува просек од околу 317 милиони денари месечно. За споредба, според него, во рок од 40 дена биле реализирани приходи од над 659 милиони денари.
Ѓорѓиевски изјави дека Град Скопје наследил презадолжени јавни претпријатија и институции, како и обврски кон добавувачи во износ од 330 милиони денари, кои, според него, биле намалени на 236 милиони денари. Тој додаде дека наследството од претходните раководства опфаќа и активни судски постапки во вредност од 2,9 милијарди денари.
Во однос на јавните претпријатија, градоначалникот посочи дека со ребалансот на Буџетот биле обезбедени средства за исплата на заостанатите плати, при што, како пример, го наведе ЈП „Паркови и зеленило“, каде биле исплатени придонесите и дел од платите.
Ѓорѓиевски информираше и за инвестиции во образованието, наведувајќи дека се градат спортски терени во шест средни училишта, се набавува ИТ опрема, смарт табли, лаптопи, прочистувачи на воздух и нов мебел за училниците.
Како дел од инфраструктурните проекти, тој ги спомена обезбедените средства за Луна паркот, првата фаза од подземната сообраќајница кај „Лимак“, кружниот тек во Ѓорче Петров, како и реконструкцијата на улицата „Фрањо Клуз“ во општина Аеродром. Според неговите зборови, решена е и експропријацијата кај Момин Поток, а во тек се активности за откочување на други заглавени проекти.
Градоначалникот соопшти дека е постигната и спогодба со Владата, со која ќе бидат обезбедени 360 милиони денари во период од три години за студентскиот превоз.
На крајот од обраќањето, Ѓорѓиевски изјави дека Град Скопје повторно се чисти и се уредува, истовремено добивајќи новогодишен изглед и програма за граѓаните.
