По празничниот период исполнет со повеќе храна, помалку движење и одмор, јануари за многумина значи обид за враќање во форма. Во таа потрага, сè поголем број луѓе се свртуваат кон вештачката интелигенција AI како алтернатива на личните фитнес тренери – но дали навистина може да ги замени?
23-годишниот Ричард Галимор од Свонси вели дека благодарение на AI се чувствува „најсилен во животот“. Со помош на алатка базирана на вештачка интелигенција, тој го зголемил бенч-пресот од 70 на 110 килограми, откако сфатил колку е физички неподготвен, пишува Би-Би-Си.
„Во мај учествував на хуманитарна трка што само ја прошетав, а порано ќе ја истрчав. Тогаш знаев дека морам нешто да сменам“, раскажува тој.
Ричард користел AI за да креира персонализиран план за тренинг и исхрана, со јасна структура и информации за нутриција и суплементи. Тренира околу два часа дневно и вели дека разликата е очигледна.
„Ми помогна да го достигнам мојот целосен потенцијал. Бесплатна е, секогаш е во џеб и можам да работам со мое темпо“, додава тој, признавајќи дека денес „не може да замисли“ тренинг без AI.
„Можеш да прашаш кога сакаш“
Слично искуство има и 21-годишната Лиа Волш од Абердер, која со помош на AI се подготвувала за својот втор полумаратон. Таа добила 11-неделен план што комбинирал трчање и теретана, прилагоден на нејзиниот рок, цели и моментална форма.
„Ми се допадна што можев лесно да го прилагодувам планот на мојот распоред. Процесот беше брз и многу практичен“, вели таа.
Минатата година користела AI апликација со аудио-тренер и темпо-водење, но оваа година избрала поедноставна алатка поради пониската цена. Најмногу ѝ значело тоа што може да поставува прашања во секое време.
„Ако личен тренер ти направи план, не можеш да му пишеш на полноќ“, вели таа. „А јас сакам да тренирам сама, во мое време, без некој да ми стои над глава.“
Нејзината цел била да заврши под 2 часа и 20 минути – трката ја истрчала за 2:11, подобрувајќи го ланскиот резултат.
„AI е корисна, но не ја заменува човечката врска“
Од друга страна, личниот тренер со 12-годишно искуство Дафид Џад од Кардиф, смета дека AI е корисна алатка – но не и замена за тренерот.
„Одлично е што луѓето учат повеќе за фитнес. Повеќе знаење значи побрз напредок“, вели тој, додавајќи дека дел од неговите клиенти веќе користат AI, што им помага подобро да ги формулираат прашањата и поефикасно да го искористат времето во теретана.
Сепак, според него, човечкиот елемент и одговорноста што доаѓаат со тренер во живо се незаменливи.
„Колку повеќе сме онлајн, толку повеќе ќе ни треба човечка врска. Компјутер не може да ја замени емпатијата и разбирањето“, вели Џад.
Тој додава дека AI може јасно да едуцира, да ја отстрани несигурноста и да биде директна, што е корисно особено за почетници. Но, вистинската посветеност, според него, се гледа кога луѓето ќе се појават лично.
„Компјутер може да ви помогне во 2 часот по полноќ, но нема да ве натера да станете во 7 наутро пред работа“, заклучува тој, додавајќи дека за многумина теретаната е токму место каде сакаат да се оддалечат од екраните.
Редакција Фронтлајн
