Министерството за внатрешни работи соопшти дека е целосно расчистено убиството што се случи за време на новогодишната ноќ пред угостителски објект во Старата скопска чаршија, при што со остар предмет беше лишен од живот 22-годишниот А.М.Д. од Република Турција, а 23-годишниот Ч.Е., исто така од Турција, беше повреден.
Како што информираат од МВР, полициски службеници од Единицата за насилен криминал и Одделението за крвни деликти при СВР Скопје, по наредба на јавен обвинител од Основното јавно обвинителство Скопје, презеле повеќе дејствија за обезбедување докази, со што настанот е целосно расчистен.
Врз основа на обезбедените докази, МВР денеска поднесе кривична пријава против М.Т. (25) од Република Турција, со престојувалиште во Тетово, поради постоење основано сомнение дека сторил кривично дело убиство од член 123 од Кривичниот законик, како и убиство во обид, согласно член 123 во врска со член 19 од истиот закон.
Во рамки на истрагата, по наредба на јавен обвинител била извршена обдукција на починатиот, биле подигнати траги за вештачење, биле извршени разговори со повеќе лица, а биле обезбедени и снимки од видео надзор, преку кои е извршена идентификација на осомничениот.
Едно лице убиено, друго повредено во тепачка во Старата скопска чаршија
Според МВР, осомничениот М.Т. на критичната ноќ во кафе бар во чаршијата започнал расправија со оштетените А.М.Д. и Ч.Е., по што тие заедно со други лица се упатиле кон плоштадот. Бидејќи не успеале да најдат такси, повторно се вратиле кон чаршијата и поминале во близина на истиот угостителски објект, каде дошло до повторна средба со осомничениот.
При продолжување на расправијата, М.Т. извадил нож и на А.М.Д. му нанел четири убодни рани во пределот на градниот кош и срцето, од кои оштетениот починал на лице место. Со еден убод му нанел телесна повреда – убодна рана во грбот и на Ч.Е., со намера и него да го лиши од живот, по што побегнал од местото на настанот.
По преземени оперативно-тактички мерки, органите на прогонот дошле до сознанија дека осомничениот се наоѓа во Косово, каде што е лишен од слобода од страна на косовските органи.
