Корисниците на Gmail се повикуваат внимателно да ги проверат своите поставки за приватност, поради ширење на предупредување дека Google автоматски користи содржина од приватни е-пораки за развој и обука на модели на вештачка интелигенција. Информацијата предизвика широка дебата на социјалните мрежи и загриженост кај дел од корисниците, пишува UNILAD.
Предупредување што ја отвори дебатата
Дискусијата ја покрена блогерот и инженер Dave Jones, кој уште во ноември минатата година на платформата X објави предупредување до корисниците на Gmail.
„ВАЖНА порака за сите што користат Gmail. Автоматски сте ВКЛУЧЕНИ да дозволите Gmail да има пристап до сите ваши приватни пораки и прилози за обука на AI модели. Мора рачно да ги исклучите Паметните функции во менито Поставки – и тоа на ДВЕ места“, напиша Џонс.
Тој објави и снимки од екранот од поставките, каде кај опцијата „паметни функции“ стои објаснување дека со нејзино активирање корисникот се согласува Gmail, Chat и Meet да го користат неговиот содржински и кориснички ангажман за „паметни функции и персонализација“.
IMPORTANT message for everyone using Gmail.
You have been automatically OPTED IN to allow Gmail to access all your private messages & attachments to train AI models.
You have to manually turn off Smart Features in the Setting menu in TWO locations.Retweet so every is aware. pic.twitter.com/54FKcr4jO2
— Dave Jones (@eevblog) November 19, 2025
Според HuffPost, овие функции се автоматски вклучени и можат да значат дека Google користи податоци од електронската пошта за „обука на AI модели“.
Google ги отфрла обвинувањата
Од Google ги демантираа овие тврдења, оценувајќи ги како „обманувачки“. Портпарол на компанијата изјави за HuffPost дека Gmail веќе долго време користи паметни функции, но дека содржината од Gmail не се користи за обука на нивниот AI модел Gemini.
„Секогаш сме транспарентни и јасни кога ги менуваме условите за користење или политиките“, истакна портпаролот. И покрај ова, дел од корисниците одлучуваат да ги исклучат опциите од претпазливост.
Како да се исклучат паметните функции
За оние што сакаат да ја исклучат оваа можност, потребно е тоа да се направи на две различни места во поставките.
На компјутер, корисникот треба да влезе во поставките преку иконата со запчаник, да ја отвори картичката „Општо“ и да ги исклучи „паметните функции“. Потоа, преку опцијата „Управување со поставките за паметни функции на Workspace“, во нов прозорец се исклучуваат истите функции и за другите Google сервиси.
Постапката е слична и на мобилни уреди, каде преку поставките за „приватност на податоци“ може да се оневозможат истите опции.
Што се губи со исклучувањето
Исклучувањето на паметните функции значи и губење на низа практични алатки. Нема да бидат достапни функциите како „Прашај Gemini“ за сумирање содржини, персонализирано пребарување, автоматско додавање настани во календар од е-пошта, како и препораки за резервации, билети или картички за лојалност во Google Wallet.
Дополнително, ќе се исклучат и паметните одговори преку Google Assistant и Gemini, како и дел од основните функции – автоматско категоризирање на е-пошта во „промоции“ и „социјални мрежи“, проверка на правопис и граматика и автоматско коригирање на текст.
Редакција Фронтлајн
