Опозициската СДСМ денеска обвини дека со одобрение на Владата предводена од Христијан Мицкоски, ги купила и акциите што државата ги управувала како конфискуван имот на Сашо Мијалков, оценувајќи дека станува збор за „уште една серија сомнителни поврзувања и интереси“.
„Со одлука на Владата на Мицкоски, Алта банка го купи и пакетот акции што државата ги управуваше како конфискуван имот на Сашо Мијалков. Случајно?“, прашуваат од СДСМ во соопштението.
Од партијата наведуваат дека, според нив, постојат „премногу случајности“ поврзани со Алта банка и политички структури блиски до ВМРО-ДПМНЕ.
„Цела структура на ВМРО е поврзана со Алта банка“, тврдат од СДСМ.
Како примери, од опозициската партија наведуваат дека за член на Управниот одбор на банката од Битола била избрана Маја Кадиевска Војновиќ, поранешна членка на Извршниот комитет на ВМРО-ДПМНЕ.
„Случајно?“, прашуваат од СДСМ.
Дополнително, во Надзорниот одбор, според СДСМ, се наоѓа Стевчо Јолакоски, за кого велат дека е баџанак на Панче Тошковски, актуелен министер во Владата.
„Случајно?“, повторуваат од партијата.
Во соопштението се споменуваат и имиња од менаџерскиот тим на банката, меѓу кои и Лидија Неделкова, како и Марјан Закев. За Закев, СДСМ наведува дека во минатото бил сопственик и управител на фирма во која во 2014 година влегла компанијата „Ексико“ Скопје.
„Тоа е фирма која во јавноста е позната по офшор-структурите и бизнис круговите блиски до Мијалков и Камчев, како и со предметот ‘Империја’. Тоа е истиот предмет во кој се запленети и акциите“, се вели во соопштението.
Од СДСМ дополнително поставуваат прашање дали по купувањето на акциите, фирма блиска до Мијалков, на негова блиска пријателка, исплатила „огромна количина пари во кеш, приближно до вредноста на купените акции“, преку домашна банка.
„АКТ следи внимателно. Секако дека ништо од ова не е случајно. Сè е јасно“, порачуваат од СДСМ.
Опозициската партија заклучува дека, според нив, станува збор за уште една потврда на, како што велат, „скандалите кои ги отвора АКТ на СДСМ“, оценувајќи дека актуелната власт е „најкорумпираната влада во Европа“.
„Затоа техничката влада мора да остане“, се вели во соопштението на СДСМ.
