Стејт департментот ја паузира обработката на иселенички визи за 75 земји во обид да се справи со апликантите за кои се смета дека веројатно ќе станат јавен товар, пишува Фокс њуз.
Меморандум на Стејт департментот, кој првпат го виде „Фокс њуз диџитал“, им наложува на конзуларните службеници да одбијат визи според постојниот закон, додека одделот ги преиспитува процедурите за проверка.
Според објавата на Фокс њуз, Македонија се наоѓа меѓу 75 земји за кои Соединетите Американски Држави ќе ја суспендираат обработката на барањата за имигрантски визи. На листата се вклучени и Албанија, Босна и Херцеговина, Црна Гора и Косово.
Извештајот го спомена и портпаролката на Белата куќа, Каролин Ливит. Дополнително, на списокот се наоѓаат и Азербејџан, Белорусија, Грузија, Ерменија, Молдавија и Русија.
Иако Стејт департментот сè уште нема објавено официјална листа, во една од објавите на платформата Икс се наведува дека „паузата влијае на десетици земји – вклучувајќи ги Сомалија, Хаити, Иран и Еритреја – чии имигранти често стануваат јавен товар за Соединетите Американски Држави веднаш по пристигнувањето“.
„Работиме на тоа да обезбедиме великодушноста на американскиот народ повеќе да не биде злоупотребувана“, соопшти Стејт департментот.
Суспензијата на обработката на имигрантските визи од наведените 75 земји ќе започне на 21 јануари, објави Фокс њуз, додавајќи дека меморандумот им наложува на американските амбасади да ги одбиваат визите согласно важечкиот закон, додека Стејт департментот ги преиспитува своите процедури.
Оваа мерка се поклопува со пошироките политики на администрацијата на претседателот Доналд Трамп насочени кон заострување на имиграциската политика.
Трамп уште во ноември најави дека „трајно ќе ја паузира“ миграцијата од сите „земји од третиот свет“, по пукањето во близина на Белата куќа, извршено од авганистански државјанин, во кое загина припадник на Националната гарда.
Во мај минатата година премиерот Мицкоски во своето обраќање на Конференција на конзервативната политичка акција во Будимпешта истакна дека
Орбан ја промовира европската иднина, а Трамп ја врати надежта.
-Да не ги заборавиме нашите пријатели кои ги штитат овие вредности. Нашиот пријател премиерот Виктор Орбан е еден од лидерите кои ги промовираат вредностите во Европа и за чија активна улога треба да биде поддржан и поздравен. Тоа е политика на цврсти основи и политика каде зборот е збор, цврст како карпа. И му благодарам за тоа. И ветриштата на промени кои ги започна администрацијата на претседателот Трамп е политика на раст и враќање на надежта, рече Мицкоски.
