Фудбалскиот клуб ФК Победа – Прилеп информира дека сениорската екипа нема да може да го продолжи натпреварувањето во Втората Македонска фудбалска лига, поради, како што се наведува, крајно тешка финансиска состојба и блокирана сметка.
Од клубот соопштуваат дека во април 2025 година дошло до промена на мнозинскиот акционер, но новиот сопственик изразил став дека не сака да го води клубот. Поради тоа, на единственото легитимно и законско акционерско собрание не биле назначени лица кои би раководеле со клубот, ниту бил избран извршен директор.
Пред почетокот на новата натпреварувачка сезона, во август, биле направени обиди за изнаоѓање заедничко решение со градоначалникот и Прилеп, по што, поради кратките рокови, било донесено привремено решение и било назначено одговорно лице со цел клубот да продолжи да функционира до изнаоѓање долгорочно решение.
На Советот на Општина Прилеп била изгласана одлука за доделување еднократна финансиска помош во износ од еден милион денари, но средствата, како што наведуваат од клубот, не биле исплатени поради распишувањето на локалните избори и до денес не се реализирани. Од ФК Победа посочуваат дека токму оваа исплата била услов клубот да може да се натпреварува во сезоната 2025/2026 во ВМФЛ.
„Во овој момент клубот е со блокирана сметка и во крајно очајна финансиска ситуација“, се наведува во соопштението, поради што сениорскиот тим не е во можност да го продолжи натпреварувањето во Втората лига.
Од ФК Победа порачуваат дека со ова ја информираат фудбалската и спортската јавност за реалната состојба во клубот.
