Повеќе од десет дена по објавувањето на, како што го нарекуваат, најголемиот нарко-скандал во регионот – заплената на пет тони дрога во Србија која, според наводите, потекнува од Македонија – од власта сè уште нема одговори, обвини денеска портпаролката на СДСМ, Богданка Кузеска, на прес-конференција.
„И после десет дена нема одговори – како пет тони дрога, со неколку камиони, ја преминале македонската граница и кој ќе одговара за тоа“, изјави Кузеска.
Според неа, молкот на институциите не е случајност, туку, како што рече, јасен индикатор дека скандалот води до врвот на власта и дека постои обид за негово заташкување.
„Јасно е дека без поддршка и логистика на структури во власта, во Министерството за внатрешни работи, во Царината и во други институции, ваква шверцерска операција не би била возможна“, нагласи таа.
Кузеска посочи дека во медиумите се појавиле информации оти камионите со дрогата биле пломбирани, што, доколку е точно, отвора, како што рече, дополнителни прашања за тоа кои институции биле вклучени.
„Секоја стока што ја минува границата мора да биде тарифирана со соодветни тарифни броеви. Ако на овој начин била пренесена дрогата, тоа значи дека биле користени други тарифни броеви, што упатува на организирана група директно поврзана со повеќе институции“, рече Кузеска.
Таа оцени дека станува збор за „скандал од огромни размери“ кој, според СДСМ, го разоткрива длабокиот криминал на власта предводена од ВМРО-ДПМНЕ и премиерот Христијан Мицкоски.
„Овој случај мора целосно да биде расчистен“, порача таа.
Кузеска се повика и на неофицијални информации објавени во српските медиуми, според кои обвинителствата во Србија и во Македонија добиле клучни податоци од DEA.
„Очајните обиди со медиумска кампања да се дефокусира вниманието на граѓаните од овој скандал нема да поминат“, додаде таа.
СДСМ, како што рече Кузеска, бара итна, независна и транспарентна истрага која ќе утврди кој е вмешан и кој дозволил пет тони дрога да поминат преку македонската граница, како и дали лицето по име Симе, кое јавноста го виде на фотографии со Мицкоски, е дел од оваа мрежа.
„Ова нема лесно да заврши. Вистината ќе излезе на виделина, а одговорност ќе има – за сите, без исклучок“, порача Кузеска.
Прочитајте и…
