Брзата одмазда на Иран по заедничката воена операција на САД и Израел ќе ги тестира одбранбените системи што САД ги воспоставија низ Блискиот Исток, а воедно ја демонстрира и воената способност на Техеран, оценува воениот аналитичар на CNN.
„Ова е одбранбената поставеност што беше воспоставена во изминатите неколку месеци, па и години, во Заливскиот регион, и сега практично се става на тест додека Иран одговара на првичниот напад“, изјави пензионираниот полковник од американските воздухопловни сили Седрик Лејтон во разговор со новинарката Беки Андерсон.
Лејтон посочи дека разузнавачките проценки даваат одредена слика за капацитетот на Иран за одмазда, но додаде дека брзината на реакцијата е изненадувачка и укажува дека земјата се подготвувала за напад од ваков интензитет.
„Тие имаат околу 2.000 до 3.000 ракети што можат да ги лансираат“, рече Лејтон. „Проблемот е што, според разузнавачките проценки, немаат толку лансери колку што имале претходно.“
Според него, се верува дека Иран располага со околу една третина од лансерите што ги имал пред нападите во јуни минатата година. „Ако тоа е точно, ако тие разузнавачки проценки се точни, би се очекувало иранскиот одговор да биде малку одложен. Но тие очигледно успеаја да организираат одговор многу брзо, побрзо отколку што очекував“, изјави Лејтон.
Иран возвраќа со удари врз американски цели низ регионот – експлозии во Дубаи и Доха
„Очекував одговор, но не одговор од ваква големина во овој момент. Очигледно се подготвувале за ова. Беа подготвени“, додаде тој.
Иранската армија соопшти дека ќе им одржи „историска лекција“ на Израел и на САД по нападите врз иранските градови.
„Како што веќе изјавивме, секоја база каде било во регионот што му помага на Израел ќе биде цел на светата Исламска Република и на нашите вооружени сили, и нема да покажеме никакво двоумење“, изјави портпаролот на вооружените сили, бригадниот генерал Аболфазл Шекарчи, пренесуваат ирански државни медиуми.
Ј. Ѓ.
(ВИДЕО) Експлозии во Техеран: Израел и САД го нападнаа Иран, Трамп потврди почеток на воена кампања
