Експлозии се пријавени во повеќе ирански градови, вклучително и во главниот град Техеран, откако Израел и САД извршија напади во саботата наутро, јавува CNN. Американскиот претседател Доналд Трамп во видео-порака објавена на социјалните мрежи потврди дека САД започнале воена кампања против Иран.
„Нашата цел е да го одбраниме американскиот народ со елиминирање на непосредните закани од иранскиот режим, сурова група на многу тешки и страшни луѓе“, изјави Трамп во осумминутното обраќање. Тој додаде дека активностите на Техеран „директно ги загрозуваат САД, нашите војници, нашите бази во странство и нашите сојузници ширум светот“.
Според американски официјален претставник, нападите во моментов се насочени кон воени цели, со цел „да се адресира иранската воена закана и да се заштитат американските сили во регионот“. Претходно биле преземени мерки за заштита на американскиот воен персонал на Блискиот Исток.
گزارشها و تصاویر دریافتی از ‘شنیده شدن صدای چند انفجار و دیده شدن دود در #تهران، شنبه ۹ اسفند’#Iran #Tehran pic.twitter.com/tIk5yAITCA
— Vahid Online (@Vahid) February 28, 2026
Претходеа недели закани и воена подготовка
Нападите следуваат по недели јавно изразени закани од страна на Трамп дека ќе го нападне Иран поради неговата нуклеарна програма и поради насилното задушување на протестите во земјата. Истовремено, во тек биле индиректни преговори меѓу Вашингтон и Техеран за иранската нуклеарна програма, во услови на засилено американско воено присуство во регионот.
На 22 јануари, Трамп изјави дека САД имаат „армада“ што се движи кон Иран „за секој случај“, додавајќи дека претпочита дијалог, но дека Вашингтон внимателно ја следи ситуацијата. Истовремено, тој изјави дека Иран сака разговори и дека САД се подготвени за тоа.
Како една од причините за можната интервенција, Трамп го наведе спречувањето на убиствата на демонстранти. Според американската организација Human Rights Activists News Agency (HRANA), најмалку 5.520 демонстранти загинале од почетокот на протестите во доцниот декември. Иранските власти наведуваат бројка од 3.117 загинати, меѓу кои „цивили“, припадници на безбедносните сили и лица означени како „терористи“. Овие бројки не можат независно да бидат потврдени.
Протестите во меѓувреме се намалија, по силната интервенција на безбедносните сили, која се смета за најсмртоносна репресија во историјата на Исламската Република.
Сведоштва од Техеран: „Имаше многу експлозии“
Жителка на Техеран за CNN изјавила дека била во својата канцеларија кога видела „различни места погодени“, како и авиони на небото.
„Имаше многу бучава и експлозии, беше застрашувачки. Сите паничеа и почнаа да заминуваат“, изјавила 35-годишната жена. „Ситуацијата е навистина лоша, погодени се неколку места, но сега мора да почекаме и да видиме што ќе се случи.“
ویدیوی دریافتی از انفجار در مرکز #تهران با شرح: “۴ تا جنگنده بیت رهبری رو زدند”#Iran #Tehran #Israel pic.twitter.com/mt6oMlDkml
— Vahid Online (@Vahid) February 28, 2026
Израел во вонредна состојба, болниците подготвени за одмазда
Израел прогласи вонредна состојба низ целата земја во очекување на иранска одмазда. Министерството за здравство нареди највисоко ниво на подготвеност во медицинските установи, а дел од најголемите болници почнаа да ги префрлаат одделите во подземни засолништа.
Медицинскиот центар „Сураски“ во Тел Авив ја активираше својата подземна итна болница и започна преместување на пациенти во заштитени простории. Болницата „Шеба“ во Рамат Ган, како и „Рамбам“ во Хаифа, исто така се подготвуваат за итен режим на работа.
Израелската служба за итна помош „Маген Давид Адом“ соопшти дека е во целосна координација со војската и Министерството за здравство додека земјата преминува од редовен во вонреден режим.
Американскиот амбасадор во Израел, Мајк Хакаби, ги повика американските државјани во земјата да бидат подготвени за „итна акција“ доколку се огласат сирени или предупредувања и да останат во близина на засолништа.
Ситуацијата во регионот останува крајно тензична, а стравувањата од поширока ескалација на Блискиот Исток се зголемуваат.
