Иран возвраќа со удари врз американски цели низ регионот. Иранската армија по нападот на САД и Израел врз Техеран и повеќе други градови, започна координирани напади врз американски цели во повеќе земји на Блискиот Исток, во ескалација каква што досега не е видена во регионот, јавува CNN. Експлозии се слушнале од плажите во Дубаи до улиците на Доха, додека ситуацијата се развива со голема брзина. Експлозии имало и во Абу Даби, главниот град на Обединети Арапски Емирати.
Explosions in Abu Dhabi 📍 pic.twitter.com/Q84vd8sqnv
— Ihtisham Ul Haq (@iihtishamm) February 28, 2026
Едно лице загина откако остатоци од пресретнати ирански ракети паднале врз станбена област во Абу Даби, главниот град на Обединети Арапски Емирати, соопшти државната новинска агенција WAM, повикувајќи се на Министерството за одбрана на ОАЕ.
Според Министерството за одбрана, станува збор за азиски државјанин кој го загубил животот откако остатоците паднале врз станбена зона во Абу Даби.
ОАЕ во соопштението наведоа дека пресретнале „повеќе“ балистички ракети истрелани од Иран, оценувајќи го нападот како „опасна ескалација и кукавички чин“.
Засега не е јасно дали експлозиите биле резултат на пресретнати ракети или директни погодоци врз цели. Она што е извесно, според анализите, е дека Техеран го гледа овој момент како егзистенцијален и реагира брзо и агресивно.
Секоја земја што е домаќин на американска воена база се смета за потенцијална цел. Меѓу нив се Обединети Арапски Емирати, Катар, Бахреин и Кувајт, а можно е листата да се прошири и на други држави во регионот.
Кога САД и Израел последен пат извршија удари врз Иран во јуни, беа таргетирани складиштата со балистички ракети, со што беше ограничена способноста на режимот за одмазда. Аналитичарите сметаат дека Техеран сега се обидува да го искористи својот арсенал додека сè уште го има.
Во оваа фаза, иранското раководство очигледно не ги става во преден план односите со соседите, туку испраќа порака дека ќе ги казни САД по секоја цена. Регионалната безбедност е сериозно нарушена, а ризикот од поширок воен конфликт на Блискиот Исток дополнително расте.
Утрово експлозии се пријавени во повеќе ирански градови, вклучително и во главниот град Техеран, откако Израел и САД извршија напади во саботата наутро, јавува CNN. Американскиот претседател Доналд Трамп во видео-порака објавена на социјалните мрежи потврди дека САД започнале воена кампања против Иран.
(ВИДЕО) Експлозии во Техеран: Израел и САД го нападнаа Иран, Трамп потврди почеток на воена кампања
„Нашата цел е да го одбраниме американскиот народ со елиминирање на непосредните закани од иранскиот режим, сурова група на многу тешки и страшни луѓе“, изјави Трамп во осумминутното обраќање. Тој додаде дека активностите на Техеран „директно ги загрозуваат САД, нашите војници, нашите бази во странство и нашите сојузници ширум светот“.
Според американски официјален претставник, нападите во моментов се насочени кон воени цели, со цел „да се адресира иранската воена закана и да се заштитат американските сили во регионот“. Претходно биле преземени мерки за заштита на американскиот воен персонал на Блискиот Исток.
Ј. Ѓ.
