Ирански дронови погодиле цели во азербејџанската енклава Нахчиван, во напад што предизвика пожари во близина на меѓународниот аеродром во регионот, јавува TRT World.
Видео снимки објавени на социјалните мрежи покажуваат густ црн чад што се издига во близина на аеродромот Нахчиван, кој се наоѓа на околу десет километри од границата со Иран.
Според азербејџанското Министерство за надворешни работи, нападите биле изведени околу пладне во четврток, при што е погоден терминалот на аеродромот во Нахчиванската автономна република, како и област во близина на училишна зграда во селото Шекерабад.
Повредени цивили
„Силно ги осудуваме овие напади со дронови извршени од територијата на Исламската Република Иран, кои предизвикаа штета на зградата на аеродромот и повредија двајца цивили“, соопшти Министерството за надворешни работи на Азербејџан.
Баку го оцени нападот како кршење на меѓународното право и предупреди дека ваквите дејства дополнително ги зголемуваат регионалните тензии.
Баку го задржува правото на одговор
Азербејџанската влада побара итно објаснување од Иран и повика на мерки за спречување на вакви инциденти во иднина.
„Бараме Исламската Република Иран во краток рок да го разјасни овој случај, да даде објаснување и да преземе неопходни мерки за вакви инциденти да не се повторат“, се наведува во соопштението.
Владата во Баку исто така предупреди дека го задржува правото да одговори со соодветни мерки доколку нападите се повторат.
Во меѓувреме, иранскиот амбасадор во Азербејџан Моџтаба Дермичилу бил повикан во Министерството за надворешни работи на разговор, каде што ќе му биде врачена дипломатска протестна нота.
Редакција Фронтлајн
