Најмалку 926 лица се убиени во заедничките напади на САД и Израел врз Иран од 28 февруари досега, соопшти синоќа иранското Министерство за здравство, пренесува Anadolu.
Портпаролот на министерството Хосеин Керманпур изјави дека 6.186 лица се повредени во нападите извршени од саботата до средата, 4 март, до 17 часот по локално време (13:30 GMT).
Во објава на платформата X, Керманпур наведе дека 2.054 повредени во моментот се хоспитализирани, додека 3.545 лица се пуштени на домашно лекување по укажаната медицинска помош.
Уште 552 повредени биле третирани на лице место.
Тој додаде дека досега се извршени 502 хируршки операции врз повредените.
Меѓу жртвите и едногодишно дете
Според податоците на министерството: 13% од загинатите се жени, а 87% се мажи.
Керманпур истакна дека 180 од загинатите се помлади од 18 години, меѓу кои и три деца помлади од пет години.
Најмладата жртва е едногодишно дете од Техеран.
Меѓу повредените има 301 лице помладо од 18 години, додека 39 се деца под петгодишна возраст.
Најмладиот повреден е шестмесечно бебе, а најстарата повредена личност е 91-годишен маж.
Иран возвраќа со напади
Израел и САД продолжуваат со напади од голем обем врз Иран од саботата, при што, според иранските власти, загинале 926 лица, меѓу кои и врховниот лидер Али Хамнеи, како и високи воени функционери.
Како одговор, Иран изврши напади со дронови и ракети, таргетирајќи Израел, но и земји од Заливот во кои се распоредени американски воени ресурси.
