СДСМ денеска на прес-конференција остро го обвини премиерот Христијан Мицкоски, тврдејќи дека неговата политика се темели на „лажни ветувања и манипулации со јавноста“. Портпаролката на партијата Богданка Кузеска изјави дека лидерот на ВМРО-ДПМНЕ „со лага дошол на власт и со лаги владее“.
„Христијан Мицкоски лаже, многу лаже. Со лага дојде на власт. Со лаги владее“, изјави Кузеска.
Кузеска рече дека Мицкоски во минатото ветувал дека ќе го поништи Преспанскиот договор и дека никогаш нема да го користи уставното име на државата.
„Ветуваше дека ќе го врати името, дека ќе го поништи Преспанскиот договор, дека никогаш нема да изговори Северна. Излажа“, рече Кузеска.
Таа додаде дека според СДСМ, Мицкоски ги довел граѓаните во заблуда за последиците од евентуално поништување на договорот.
„Не им кажа на граѓаните дека поништување на Преспанскиот договор ќе значи враќање на ПЈРМ и ФИРОМ, губење на членството во НАТО и загрозување на безбедноста“, изјави Кузеска.
Портпаролката на СДСМ се осврна и на, како што рече, други јавни изјави на премиерот.
„Јавно Мицкоски изјави дека доколку се открие поврзаност помеѓу ВМРО и агенцијата за обезбедување од дискотеката ‘Пулс’, ќе си даде оставка. Излажа“, рече Кузеска.
Таа го спомена и периодот кога Мицкоски бил советник на поранешниот премиер Никола Груевски.
„Велеше дека како советник на Никола Груевски работел ‘про боно’. Излажа“, изјави Кузеска.
Во изјавата се наведува и дека власта не покажува одговорност во однос на институционалното функционирање.
„Ветуваше одговорност и правда. Денеска го штити Тошковски. Криминалците се во врвот на власта, одговорност нема, правдата е погребана“, изјави Кузеска.
Таа се осврна и на назначувањето на Душан Адамовиќ за почесен конзул во Србија.
„За поставувањето на Душан Адамовиќ за почесен конзул во Србија рече дека стои македонскиот амбасадор. И за ова излажа“, рече Кузеска.
Кузеска на прес-конференцијата изнесе и тврдења за медиумско влијание во земјата.
„40% од медиумите се под контрола преку мрежата на Орбан и тоа се злоупотребува за манипулации со граѓаните“, изјави таа.
