Владата на денешната редовна седница донела одлука до Собранието да поднесе предлог Ненад Савевски да биде избран за нов државен јавен обвинител, соопштија од Владата.
Одлуката е донесена по разгледување на мислењето на Советот на јавните обвинители во рамки на постапката за избор на нов државен јавен обвинител.
Според владината информација, изборот е направен врз основа на принципите на професионалност, интегритет и стручност, како и посветеност на владеењето на правото.
Савевски судија во Кривичниот суд
Ненад Савевски е судија во Основниот кривичен суд Скопје, во одделот за организиран криминал и корупција. Во својата кариера претходно работел и како јавен обвинител во Основното јавно обвинителство.
Тој е магистер по правни науки од областа на казненото право на Правниот факултет „Јустинијан Први“ при Универзитетот „Св. Кирил и Методиј“ во Скопје, со положен правосуден испит.
Искуство во меѓународни и експертски проекти
Според Владата, Савевски има и експертски ангажмани во меѓународни организации и правосудни реформи. Тој бил експерт во ОБСЕ Македонија, учествувал во Националната конвенција за ЕУ – Поглавје 23, како и во проекти на Советот на Европа, ОБСЕ и УСАИД.
Воедно, работел на проекти поврзани со кривична постапка, притвор и посебни истражни мерки.
Академска и едукативна работа
Савевски е предавач во Академијата за судии и јавни обвинители, како и национален тутор и обучувач во програмата HELP на Советот на Европа. Во рамки на својата академска работа има објавено повеќе научни трудови како автор и коавтор.
Владата: Изборот е важен за кредибилитетот на системот
Во соопштението се наведува дека изборот на државен јавен обвинител е прашање од особена важност за кредибилитетот на правосудниот систем.
„Предлогот кој Владата го упатува до Собранието се темели на стручни оценки и мислења доставени од Советот на јавни обвинители, како и на внимателна анализа на професионалниот интегритет, искуството и досегашните резултати на кандидатот“, се наведува во соопштението.
Владата оценува дека предложениот кандидат ги поседува потребните професионални и лични квалитети и дека може да придонесе кон зајакнување на институционалниот капацитет и довербата на јавноста во правосудниот систем.
