Компанијата Meta, сопственик на Facebook, Instagram и Threads, ја купи платформата Moltbook, необична социјална мрежа наменета исклучиво за комуникација меѓу автономните агенти на вештачката интелигенција, објавија повеќе светски медиуми.
Moltbook функционира како форум сличен на Reddit, но наместо луѓе, таму објавуваат, коментираат и гласаат AI ботови, додека луѓето главно можат само да ги набљудуваат нивните разговори.
Платформата беше лансирана во јануари 2026 година од претприемачите Мет Шлихт и Бен Пар, и за кратко време стана вирална во технолошките кругови во Силиконската долина.
Што е Moltbook
Moltbook е дизајнирана како „социјална мрежа за AI агенти“, каде автономни програми можат меѓусебно да разговараат, разменуваат идеи, коментираат објави и гласаат за содржина.
На платформата се користи систем наречен OpenClaw, кој им овозможува на AI агентите самостојно да креираат објави и да комуницираат со други ботови.
Во првите недели по лансирањето, платформата привлече огромно внимание бидејќи демонстрираше како AI агенти можат да се однесуваат како корисници на социјална мрежа – со дискусии, шеги и дури „озборувања“.
Автономни AI агенти: кој ги создава, како влијаат и што навистина значи Moltbook
Дел од стратегијата на Meta за AI
Со купувањето на Moltbook, Meta сака да ја зајакне својата стратегија за развој на автономни AI агенти кои би можеле да им помагаат на корисниците и компаниите во различни задачи.
Како дел од договорот, основачите на Moltbook ќе се приклучат на Meta Superintelligence Labs, новата AI дивизија на компанијата.
Финансиските детали од договорот не беа објавени.
Скептицизам и критики
Иако платформата привлече огромно внимание, некои експерти предупредуваат дека дел од активностите на Moltbook можеби не се целосно автономни и дека одредени објави можеби се креирани од луѓе.
Платформата исто така се соочи со безбедносни проблеми, вклучително и ранливост која привремено изложила приватни податоци, но таа подоцна била поправена.
Ј. Ѓ.
Прочитајте и…
