Цените на нафтата „Брент“ денеска пораснаа на повеќе од 114 долари за барел, а европските цени на гасот скокнаа за 30 отсто на тригодишен максимум откако Иран почна напади врз клучната енергетска инфраструктура на Блискиот Исток.
Цената на суровата нафта во 9.30 часот порасна на 97,189 долари за барел, а цената на нафтата „Брент“ за 6,45 отсто на 114,187 долари. Европските фјучерси на гас за април на отворањето на амстердамската берза ТТФ се продаваа за цена од 69,5 евра за мегават-час, а во еден момент надминаа и 70,8 евра.
Иран изврши ракетни напади врз катарскиот индустриски град Рас Лафан, комплекс во кој се наоѓа најголемата фабрика за извоз на течен природен гас (ЛНГ), а Катар пренесе дека нападите нанеле голема штета, пренесе Си-ен-би-си. Акцијата следуваше по предупредувањето од Техеран за напади врз енергетските постројки во Катар, Саудиска Арабија и Обединетите Арапски Емирати откога Израел бомбардира постројка за преработка на природен гас во Иран.
Абу Даби исто така ја прекина работата на своите гасни постројки „Хабшан“ откога пресретнатите ракети предизвикаа паѓање остатоци, а ЛНГ-инфраструктурата во Бахреин наводно е погодена со тешки ракетни напади.
Европските индекси се главно во пад, а инвеститорите ги очекуваат одлуките на Банката на Англија и на Европската централна банка за каматните стапки, со прогноза дека двете банки најверојатно ќе ги задржат каматите на исто ниво поради големата неизвесност за глобалната економија предизвикана од војната на Блискиот Исток.
Индексот на франкфуртската берза DAX во 9.30 часот падна за 2,06 отсто, на 23.020,50 поени, францускиот CAC 40 за 1,55 отсто, на 7.841,47 поени, британскиот FTSE 100 за 1,55 отсто, на 10.145,75 поени, а московскиот MOEX порасна за 0,53 отсто, на 2.886,56 поени.
Цената на златото падна на 4.729,34 долари за унца, а цената на пченицата порасна на 6,0581 долари за бушел. Вредноста на еврото во однос на доларот на валутната берза Форекс изнесува 1,14545 долар, што е за 0,02 отсто повеќе отколку на почетокот на тргувањето.
Според податоците од американските берзи, вредноста на американскиот берзански индекс Dow Jones на затворањето на тргувањето во средата падна за 1,63 отсто, на 46.225,15 поени, S&P 500 за 1,36 отсто, на 6.624,70 поени, а вредноста на индексот Nasdaq за 1,46 отсто, на 22.152,42 поени.
