Советот на чест при Здружението на новинарите на Македонија (ЗНМ) оцени дека културата на говор и почитувањето на етичките стандарди се клучни за новинарската професија, во контекст на последниот случај со однесувањето на новинар на прес-конференција во Тетово.
Во соопштение, Советот посочува дека правото на новинарите слободно да поставуваат прашања и да известуваат критички е неотуѓиво, но истовремено носи обврска за почитување на професионалните стандарди.
Станува збор за случај поврзан со однесувањето на новинарот Невриј Адеми на прес-конференцијата на министерката за образование и наука Весна Јаневска, кој, како што наведуваат, отворил јавна дебата во медиумскиот простор.
Советот на чест оценува дека начинот на комуникација и тонот на обраќање во конкретниот случај не се во согласност со професионалниот јавен дискурс.
„Во конкретниот случај, Советот цени дека начинот на комуникација и тонот на обраќање на новинарот не соодветствуваат со принципите на достоинствен и професионален јавен дискурс“, се наведува во соопштението.
Оттаму се повикуваат и на член 15 од Кодексот на новинарите, според кој новинарот треба да ја негува културата на говорот и етиката.
„Непримерната комуникација со јавноста е неспојлива со новинарската професија“, посочува Советот.
Советот нагласува дека ваквите случаи не придонесуваат за зголемување на довербата во медиумите, ниту за квалитетен јавен дијалог.
Воедно, се упатува апел до новинарите и медиумските работници да се придржуваат кон највисоките професионални стандарди и да придонесуваат кон градење на взаемна почит во јавниот простор.
Во соопштението се посочува и дека почитта во односите меѓу институциите и медиумите треба да биде двонасочна, при што институциите имаат обврска да обезбедат услови за непречена и професионална работа на новинарите.
Советот на чест исто така предупредува дека случајот не треба да се користи за дневнополитички цели или за создавање дополнителни тензии, особено во етнички контекст.
Советот најавува дека ќе продолжи да ги следи ваквите случаи и да реагира во рамки на своите надлежности, со цел унапредување на етичките стандарди во новинарството.
