Американскиот претседател Доналд Трамп, одговарајќи на новинарски прашања, повтори дека обезбедувањето на Ормускиот Теснец ‘не е нивна работа’. Трамп изјави дека САД ‘на ниту еден начин нема да се мешаат’ во случувањата во теснецот и порача дека одговорноста за одржување на овој клучен пловен пат отворен лежи кај земјите кои зависат од него.
Трамп изјави дека ‘нема причина ние да го правиме тоа’. ‘Тоа не е на нас. Тоа ќе биде на Франција. Тоа ќе биде на сите кои го користат теснецот’, додаде тој. Претходно денеска, Трамп остро ги критикуваше американските сојузници бидејќи не прават повеќе за да ги поддржат американските напори во иранската војна.
Трамп претходно изјави дека Соединетите Држави ќе се повлечат од Иран за ‘две или три недели’, нагласувајќи дека главната цел на воената операција – спречување на развојот на иранското нуклеарно оружје – е веќе остварена. Тој порача дека Иран е ‘уназаден за 15 до 20 години’ и дека неговата воена инфраструктура е тешко ослабена, со тврдење дека земјата останала без клучните капацитети и водство.
Трамп додаде дека САД сега ‘ја довршуваат работата’, а иако не ја исклучи можноста за договор со Техеран, истакна дека преговорите не се пресудни за завршување на операцијата.
