Поранешната потпретседателка, и кандидатка за претседател на минатите избори во САД, Камала Харис, за првпат јавно потврди дека размислува за трета претседателска кандидатура во 2028 година, пренесува Ен-би-си Њуз (NBC News). Говорејќи на конференцијата на Националната акциона мрежа во Њујорк, Харис на прашањето од свештеникот Ал Шарптон за нејзините планови за следната изборна трка одговори дека постои таква можност и дека во моментов активно размислува за тоа.
Нејзиното појавување во Менхетен беше проследено со силни скандирања од присутните кои ја повикуваа повторно да се кандидира, со што таа се издвои како еден од најистакнатите потенцијални демократски претенденти меѓу присутните гувернери Џ.Б. Прицкер, Џош Шапиро и Вес Мур. Харис нагласи дека нејзината одлука ќе зависи од тоа каде и како може најдобро да им служи на Американците, нагласувајќи дека на народот му е преку глава од бирократски процеси и дека бара конкретен напредок.
Во својот говор, поранешната потпретседателка упати остри критики кон претседателот Доналд Трамп, обвинувајќи го дека ги излажал граѓаните за економските ветувања и дека неговата надворешна политика, особено во однос на војната со Иран, ги довела во опасност американските војници. Харис ја оспори неговата изјава дека нуклеарниот арсенал на Иран е уништен, нарекувајќи го тоа очигледна невистина.
Од друга страна, од Белата куќа веднаш пристигна реакција преку портпаролот Куш Десаи, кој ги отфрли нејзините обвинувања. Тој ја нарече Харис „царица на границата“ и повторно го актуализираше прашањето за веродостојноста на нејзините изјави за работата во Мекдоналдс во младоста. Иако раните анкети ја позиционираат Харис високо на листата за 2028 година, аналитичарите потсетуваат дека нејзината препознатливост е резултат на претходната функција, но патот до нова номинација по поразот во 2024 година останува неизвесен.
