Точно напладне, во 12:00 часот, пред просториите на Министерството за култура и туризам ќе се одржи најавениот масовен протест на Синдикатот на културата на Република Македонија (СКРМ).
Вработените во културата денеска излегуваат на улица за да го изразат својот револт против она што го нарекуваат институционално игнорирање и сериозно нарушување на нивните работнички права.
Од Синдикатот алармираат дека Колективниот договор е под постојан удар и дека повеќе нема простор за чекање, оправдувања или молк. Главната порака на денешниот собир е дека достоинството на вработените во овој сектор е понижено, а почитувањето на законските рамки и веќе утврдените договори мора да биде приоритет на надлежните. Барањата на уметниците и сите вработени во културата се јасни: правда, почит и крај на игнорантскиот однос.
Овој протест е кулминација на долготрајното незадоволство во секторот култура, каде работниците сметаат дека нивните права систематски се газат. Пред ресорното министерство денеска се очекува масовен одзив, со цел да се испрати порака дека културните дејци се обединети во борбата за своите права и дека достоинството во професијата нема цена.
