Милијардерот Илон Маск сведочеше пред федералниот суд во Калифорнија во рамки на неговата тужба против компанијата OpenAI, предупредувајќи дека вештачката интелигенција (ВИ) е технологија која „би можела да нè убие сите“. Како што пренесува американскиот медиум CNN, оваа правна битка би можела да ја промени иднината на една од највлијателните технологии на денешницата.
Маск ги обвинува OpenAI, нејзиниот извршен директор Сем Алтман и претседателот Грег Брокман дека го измамиле и ја предале првичната непрофитна мисија на компанијата за развој на безбедна вештачка интелигенција од отворен код за доброто на човештвото. Во тужбата, тој бара отштета од неверојатни 130 милијарди долари, враќање на компанијата во непрофитна структура и отстранување на Алтман и Брокман од управниот одбор. Ко-обвинет во случајот е и технолошкиот гигант Microsoft.
„Имам екстремна загриженост околу вештачката интелигенција. Не сакаме да имаме ’Терминатор’ сценарио“, изјави Маск од клупата за сведоци, додавајќи дека ВИ може да донесе просперитет, но и страшни последици за човештвото. Тој тврди дека помогнал во основањето и финансирањето на OpenAI во 2015 година со најмалку 44 милиони долари, пред да ја напушти компанијата во 2018 година по борба за превласт.
Од друга страна, адвокатскиот тим на OpenAI жестоко ги отфрла обвинувањата, тврдејќи дека тужбата на Маск е мотивирана од љубомора и желба да се уништи конкуренцијата, со оглед на тоа што тој сега има сопствена компанија за вештачка интелигенција (xAI).
„Ние сме тука бидејќи господинот Маск не го доби она што го сакаше во OpenAI. Моите клиенти имаа храброст да продолжат и да успеат без него. На Маск можеби тоа не му се допаѓа, но тоа не е основа за тужба“, изјави Бил Савит, главен адвокат на OpenAI, додавајќи дека токму Маск барал компанијата да премине во профитна структура, но си заминал кога не му била дадена целосната контрола.
Судењето започна тензично, откако судијката Ивон Гонзалес Роџерс го укори Маск и му се закани со забрана за јавни настапи (gag order) поради неговите објави на социјалната мрежа Х (поранешен Твитер). Пред почетокот на рочиштето, Маск напиша: „Измамникот Алтман и Грег Стокман украдоа хуманитарна организација. Точка“.
Овој процес, според анализите на CNN, претставува сериозна закана за OpenAI, која планираше да излезе на берза (IPO) подоцна оваа година, потег што се очекуваше да донесе огромни финансиски средства за нејзина целосна доминација во индустријата.
Редакција Фронтлајн
