Додека Реал Мадрид се обидува да ја смири ситуацијата по тепачката меѓу Валверде и Чуамени, клубот се соочува со нов, досега невиден притисок од јавноста. Како што известува главниот кореспондент на „Sky Sports“, Каве Солхекол, навивачите на „кралскиот клуб“ покренаа онлајн петиција за итно заминување на Килијан Мбапе, која веќе урна секакви рекорди.
Она што започна како симболичен протест на социјалните мрежи под слоганот „Mbappé Out“, прерасна во глобален феномен. До денес, петицијата ја потпишале неверојатни 30 милиони луѓе. Иако експертите за сајбер-безбедност се сомневаат во автентичноста на секој поединечен потпис, симболиката е јасна – незадоволството од француската суперѕвезда е на точка на вриење.
Главниот проблем за навивачите не е индивидуалниот учинок на Мбапе. Статистиката вели дека тој постигна импресивни 85 гола во изминатите две сезони откако пристигна во Мадрид. Сепак, фановите го обвинуваат за следново:
Мбапе често е критикуван дека не помага во дефанзивата и нема хемија со Винисиус Јуниор.
Статистиката покажува дека Реал ги добива речиси сите натпревари кога Мбапе не е во стартниот состав, додека со него во тимот имаат само една победа во последните шест меча.
„Лос Бланкос“ немаат освоено голем трофеј (Ла Лига или Лига на шампиони) откако Французинот пристигна на „Бернабеу“, додека неговиот поранешен клуб ПСЖ веќе освои една европска титула и повторно е во финале.
Масло на огнот додадоа и вестите за неговото наводно изолирање од тимот и расправии со стручниот штаб. Навивачите се гневни и поради неговото неодамнешно патување во Сардинија во време кога тимот се подготвува за клучни натпревари, сомневајќи се дека негов главен приоритет е сопствената кондиција за претстојното Светско првенство во САД, Канада и Мексико.
Иако Флорентино Перез засега не размислува за продажба на својата најголема инвестиција, притисокот е огромен. Овој викенд, на натпреварот против Барселона, сите очи ќе бидат вперени во Мбапе. Дали тој ќе успее да ги замолкне критичарите на теренот, или „Ел Класико“ ќе биде неговиот последен голем настап во дресот на Реал, останува да видиме.
Ј. Ѓ.
