По единаесет години, повеќе од 1.800 епизоди и статус на долгогодишен лидер во доцните вечерни телевизиски термини, Стивен Колберт се збогуваше со својата култна емисија „The Late Show“. Финалето на телевизијата Си-Би-Ес (CBS) беше емотивно, исполнето со ѕвездени гости предводени од музичката легенда Пол Макартни, но истовремено проткаено со горчлив вкус поради неочекуваното и контроверзно укинување на шоуто.
Причината за заминувањето на Колберт предизвика огромно внимание во американската јавност. Имено, емисијата беше откажана откако водителот отворено ја исмеа телевизиската мрежа за наводната спогодба од 16 милиони долари со американскиот претседател Доналд Трамп, поврзана со обвинувањата за злонамерно монтирање на интервју со неговата политичка ривалка Камала Харис. Додека Колберт оваа спогодба ја нарече „голем дебел поткуп“, раководството на Си-Би-Ес инсистираше дека одлуката за укинување на најгледаното шоу е од чисто финансиски причини и дека случајно се совпаѓа со лобирањето на нивната матична компанија „Парамаунт“ за владино одобрување на спојувањето со „Скајденс медија“ вредно 8,4 милијарди долари.
И покрај тензиите зад кулисите, Колберт одлучи да го заврши своето телевизиско патување со стил. Тој ја нарече својата емисија „машина за радост“, заблагодарувајќи му се на тимот и на публиката за неопходната енергија во изминатата деценија. Како главен изненадувачки гостин за последната вечер се појави Пол Макартни, што имаше огромна симболика бидејќи студиото каде што се снима шоуто, култниот театар „Ед Саливан“, е токму местото каде што Битлси го имаа своето историско деби во САД во 1964 година.
За време на разговорот, Макартни се потсети како стилистите во 1964 година сакале да им стават светлопортокалова шминка на телевизискиот настап, на што Колберт не можеше да одолее да не испрати уште една суптилна шега на сметка на Доналд Трамп. Тој коментираше дека таквата нијанса е „многу популарна во одредени кругови овие денови“, предизвикувајќи гласна смеа во публиката. Покрај Макартни, во збогувањето со Колберт преку кратки појавувања учествуваа и бројни други познати личности, меѓу кои актерите Брајан Кранстон, Пол Рад и Рајан Рејнолдс, комичарот Џон Стјуарт и астрофизичарот Нил Деграс Тајсон.
Завршницата на продолжената 80-минутна епизода беше резервирана за музика и носталгија. Пол Макартни, заедно со Колберт, музичарот Елвис Костело, поранешниот шеф на бендот Џон Батист и сегашниот Луис Като, ја изведоа класиката на Битлси „Hello, Goodbye“. Додека целата екипа на шоуто и семејството на Колберт излегоа на сцената, честа да ги изгаси светлата во театарот му припадна токму на Макартни. Во надреалната последна сцена, типична за хуморот на водителот, зградата беше симболично вшмукана во димензионален црвоточен тунел претворајќи се во снежна кугла, означувајќи го дефинитивниот крај на една значајна телевизиска ера.
Ј. Ѓ.
