Пратеничката на СДСМ, Сања Лукаревска, ја обвини Владата за предложената фискална стратегија 2027 – 2031 година, оценувајќи дека таа е заснована на нереални очекувања и недоволно јасни економски политики. Лукаревска посочи дека стратегијата се потпира на надеж, а не на структурни реформи, додавајќи дека се очекува БДП да расте побрзо од задолжувањето, без јасен одговор како ќе се справи идните ценовни шокови.
Лукаревска потенцираше дека Владата повторно ги коригира економските проекции, при што растот на БДП се намалува од 3,8 на 3,5 проценти, а инфлацијата се зголемува од 2,5 на 4,5 проценти, што, не е техничка корекција, туку доказ за погрешни и преголемо оптимистички политики.
„Намалувањето на долгот не се базира на реформи или на кратење на расходи, туку на претпоставка дека економијата ќе расте побрзо од задолжувањето. Ваквиот пристап создава опасен модел на развој. Се создава економија во која државата се задолжува за да ја одржува тековната потрошувачка, наместо да создава развој, рече Лукаревска.
Лукаревска предупреди дека економијата е со ниска продуктивност и слаб институционален капацитет: „Наместо системски реформи, гледаме ад хок мерки, краткорочни субвенции и политички популизам. Дефицитот на тековната сметка се проширува и достигнува 5 проценти од БДП, што е последица на зголемен трговски дефицит. Имаме повеќе одлив отколку прилив на девизни средства и недостиг од околу една милијарда“, рече Лукаревска.
Осврнувајќи се на локалната самоуправа, Лукаревска рече дека општините се во сериозна финансиска состојба, со раст на долгот и слаб капацитет за стабилни приходи.
Во однос на оценките на фискалниот совет и ММФ, Лукаревска посочи дека тие потврдуваат сериозни слабости.
„Фискалниот совет укажува на висока зависност од индиректни даноци и неефикасна јавна потрошувачка“, додека „ММФ предупредува дека буџетските дефицити ги надминуваат таргетите и ја намалуваат фискалната дисциплина. Политиките мора да бидат претпазливи и реалистични, особено во однос на растот, инфлацијата и каматните стапки. Оваа стратегија не значи намалување на задолжувањето, туку само надеж дека растот ќе го прикрие долгот.
Сите четири главни цели во оваа фискална стратегија се свртени со негативен предзнак. Далеку сме од одржливи и стабилни јавни финансии. Постепената и одговорна фискална консолидација е одамна претерана. Најавата за некаква социјална правичност е повеќе флоскула отколку реално остварување од вашата Влада, потенцираше пратеничката на СДСМ, Сања Лукаревска.
